वीरगंज । वीरगंज महानगरपालिका वडा नं. १५ लक्ष्मणवामा कल सेन्टर संचालन गरेर गठी गर्ने गिराेहका ३ जना चिनिया नागरिक पक्राउ परेका छन् । पक्राउ पर्नेमा चीनको हुनान प्रान्तमा बस्ने ३३ वर्षीय लिउ गुइ चाइ, हुवेइ प्रान्तका २६ वर्षीय वाङ बोहाङ र हुबेई प्रान्तका ३६ वर्षीय सियाङ जियाओ रहेका जिल्ला प्रहरी कार्यालय पर्साले जनाएकाे छ ।
लक्ष्मणवामा रहेकाे नन्दु पटेलको घर भाडामा लिएर सञ्चालन गरिएको उक्त कल सेन्टरकाे कार्यालयबाट डेक्सटप कम्प्युटर १२० थान, मनिटर ११८ थान, ल्यापटप ४ थान, विभिन्न ब्राण्डका मोबाइल ३५ थान, भारतीय जियो मोबाइलको सिम १३ थान, प्रिन्टर १ थान, किबोर्ड २६ थान, इन्टरनेट स्वीच ५ थान, वाइफाइ राउटर २ थान, इन्भर्टर २ थान, विभिन्न बैंकको एटिएम कार्ड तीन थान, मलेसियन मुद्रा ३७ रिंगिट, कम्बोडियन मुद्रा ३ हजार पाँच सय र नेपाली रुपैयाँ ४३ हजार तथा पक्राउ परेका तीनै जना चिनियाँ नागरिककको पासपोर्ट तीन थान बरामद गरिएको जिल्ला प्रहरी कार्यालय पर्साका प्रहरी उपरीक्षक (एसपी) कुमाेध ढुंगेलले जानकारी दिए ।
त्यस्तै उक्त घरबाटै बीआर ०१ सिएक्स ५७९२ नम्बरको सेतो रंगको आई ट्वान्टी कार एक थान र प्र.२-०३-०११ प १३६७ नम्बरको एफजेड मोटरसाइकल १ थानसमेत बरामद गरिएको एसपी ढुंगेलले बताए ।
अनुसन्धानकाे क्रममा कल सेन्टर स्थापना गरि कर्मचारीहरू समेत राखि नेपाल, भारत, पाकिस्तान, लगायतका विभिन्न देशहरूमा रहेको व्यक्तिहरूसंग साेसल मिडिया तथा टेलीफोन मार्फत विभिन्न प्रलोभनमा पारी ठगी गर्ने गरेको देखिएको एसपी ढुंगेलले वताए ।पक्राउ परेकाहरु अन्य देशका विभिन्न स्थानमा विभिन्न व्यक्तिहरूलाई एजेन्ट बनाई ठगी गर्ने गरेको र ठगी गरेको रकम भारतीय विभिन्न बैंकहरू मार्फत कारोबार हुने गरेको देखिएको एसपी ढुंगेलले जानकारी गराए ।
पक्राउ परेका व्यक्तिहरू चिनिया नागरिकहरु विरुघद्ध हाल अभद्र व्यवहार मुद्दामा जिल्ला अदालतबाट म्याद थप गरि अनुसन्धान भइरहेकाे र निजहरूको संवाद प्रायजसो चिनिया भाषामा रहेकोले सो सम्बन्धमा अनुसन्धान गर्न भाषाविदहरूलाई बोलाई थप प्रमाणहरु फेला पार्न कार्य भइरहेकाे उनले वताए ।
अनलाइन लट्री र अनलाइन सपिङ्ग जस्ता विभिन्न प्रकारको प्रलोभन देखाई नेपाली तथा विदेशीहरूबाट सर्वसाधारण नेपाली तथा बिदेशी व्यक्तिहरूलाई ठगी गर्ने गिरोह यस जिल्लामा समेत सक्रिय रहेको भन्ने सूचनाको आधारमा जिल्ला प्रहरी कार्यालयबाट एसपी ढुंगेलकाे नेतृत्वमा खटिएकाे प्रहरी टाेलीले लक्ष्मणवास्थित उक्त घरमा शनिबार छापामारी गरेकाे थियाे ।
