वीरगंज । दाइजाेकाे बिषयमा विवाद हुँदा विहे नै भाँडिएकाे घटना नयाँ मोड लिएकाे छ । वीरगंज महानगरपालिकाकाे वडा नं. २७ रामगढवामा साेमबार राति बरमाला पछि हुने कन्या निरिक्षणकाे क्रममा बेहुला र बेहुली पक्ष बिच विवाद हुँदा विवाह नै हुन सकेन ।
पछि विवाद झडपमा परिणत भएपछि कलैया उपमहानगरपालिकाकाे वडा नं. ४ का २६ बर्षिय उमेश साह (बेहुला) सहित बेहुला पक्षका ५ जनालाई नियन्त्रणमा लिएर प्रहरीले मुद्दा चलाएकाे छ ।
बेहुली पक्षले केटाले थप दाइजाेकाे रुपमा सुनकाे सिकरी माग गरेका कारण विवाह भाँडिएकाे भन्दै मंगलबार दिउसाे जिल्ला प्रहरी कार्यालयमा उजरी दिएपछि बेहुला पक्षका पांचै जना विरुद्ध प्रहरीले विवाह विरुद्धकाे कसुरमा मुद्दा चलाएकाे हाे ।
तर बेहुला पक्षले प्रेम विवाह भइरहेकाेले दाइजाेका कारण विवाह भाँडिएकाे कुरामा सत्यता नरहेकाे वताएका छन् । बेहुला उमेशकी आमा राधिका देवी साह गोढले बिहेको क्रममा दाईजोको गलत आरोप लगाएको बताएकी छन् । उनले केटी पक्षले आफ्नो हैसियतभन्दा अधिक गहना मागेपछि विवाद भएको बताएकी छन् ।
दाईजो लेनदेनको कुनै कुरा नभएको बताउँदै उनले केटी पक्षले मनगढन्ते कहानी बनाएर छोराको इज्जत प्रतिष्ठा नास गरेको बताएकी छन् । बेहुला उमेशकी आमा राधिकाले बिहे गर्न जाँदा केटा पक्षबाट केटी पक्षको लागि जाने गरगहना मध्ये थप गहना मागेपछि मात्र विवाद भएको बताएकी हुन् ।
विगत दुई बर्षदेखि दुल्हा र दुल्हीबीच प्रेम सम्बन्ध चल्दै आएको बताउँदै राधिकाले परिवारिक सहमतिमा विहेको कुरा भएको बताईन् । उनले प्रेम विवाह भएकै कारण कुनै दाईजो नमागेको पनि दाबी गरिन् ।
बुधबार सामाजिक सञ्जालमा सार्वजनिक भिडियोमा बोल्दै बेहुला उमेशकी आमा राधिकाले भनेकि छन्,‘ यो दाइजोको विवाद हुदै होइन। केटी पक्षले मनगढन्ते र झूठो आरोप लगाएर हाम्रो परिवारको इज्जतको नाश गरेका छन्।’
राधिकाले आफनो परिवारको हैसियत भन्दा बढी बेहुली पक्षले बेहुलीका लागि गहना मागेपछि उल्टै दाइजोमा सुनको सिक्री मागेको बहाना बनाएर आफनो छोरा, पति, छोरा र ज्वाँइलाई फसाएर प्रहरीमा थुन्न लगाएको बताएकी छन् ।
मंगलबार दिनभरी केटा र केटी पक्षका बिच भएकाे छलफलमा सहमती जुटन नसकेपछि प्रहरीले मुद्दा दर्ता गरेकाे थियाे । प्रहरीले मुद्दा चलाएपछि कन्या निरिक्षण पछि भाँडिएकाे विवाह अन्याैल भएकाे छ ।
