वीरगंज । जिल्ला प्रशासन कार्यालय पर्साले बुधबार रातिदेखि पूर्ण रुपले कर्फ्यु हटाएको छ । फागुन ७ गते साेमबार सांझ ५ बजेदेखि लगाइएको कर्फ्यु ९ गते बुधबार राति १० बजेदेखि लागू हुने गरी पूर्ण रुपले हटाइएको पर्साका सहायक प्रमुख जिल्ला अधिकारी शिव प्रसाद लम्सालले जानकारी दिए ।
पर्साका प्रमुख जिल्ला अधिकारी दिनेश सागर भुसालले बुधबार सान्झ एक सूचना जारी गर्दै वीरगंजकाे स्थिती सामान्य हुँदै गएपछि स्थानीय प्रशासन ऐन २०२८ को दफा ६ (क) को उपदफा (५) बमोजिम पूर्ण रुपले कर्फ्यु हटाइएको जनाएका छन् ।
गत फागुन ३ गते विहीबार रौतहट जिल्लाको ईशनाथ नगरपालिकाको मोतिपुरमा सरस्वतीकाे मुर्ती सेलाउन जाने क्रममा दुई पक्षबीच झडप भएको थियाे । सोही घटनाकाे विराेधमा एक समुहले वीरगंजमा विराेध प्रदर्शन गर्दै जिल्ला प्रशासन कार्यालयमा ज्ञापन पत्र बुझाउन पुगेकाे थियाे ।
साेही क्रममा अर्काे समुहले छपकैयाबाट विराेध प्रदर्शन गर्दै आदर्शनगर सम्म पुगेपछि प्रहरीले उनीहरुलाई त्यही राेकन खाेजेकाे थियाे । त्यसै क्रममा प्रहरी र प्रदर्शनमा उत्रेकाहरु बिच झडप समेत भएकाे थियाे । प्रहरीले भिड तितरवितर पार्न केही राउन्ड आश्रु ग्यास समेत प्रहार गरेकाे थियाे । साेही क्रममा ९ जना प्रहरी समेत घाइते भएका थिए ।
त्यसपछि पनि स्थिती साम्य नभएपछि हुन सक्ने सम्भावित घटनालाई मध्यनजर गर्दै प्रशासनले अन्निचितकालि कर्फु आदेश जारी गरेकाे थियाे ।
मंगलबारमा कर्फ्युकाे क्रममा हिन्दु समाजले ठाउँ ठाउँमा प्रर्दशन गरेकाे थियाे । प्रदर्शन गर्ने २१ जनालाई प्रहरीले नियन्त्रणमा समेत लिएकाे थियाे । वीरगंजकाे विभिन्न ठाउँबाट पक्राउ परेका सबै जनालाई मंगलबार सांझ प्रहरीले छाेडेकाे थियाे ।
