वीरगंज । निर्वाचन आयाेगले रिक्त भएकाे ठाउँमा उपनिर्वाचन गराउन तयारी थालेकाे छ । आयाेगले रिक्त रहेकाे ठाउँहरुमा उपनिर्वाचन गराउन तयारी अन्तर्गत मतदाता नमावलीमा नाम दर्ता गराउन आह्वान समेत गरेकाे छ ।
आयाेगले साेमबार प्रेस विज्ञप्ती जारि गर्दै वि.सं. २०७९ वैशाख १० गते स्थानीय तह निर्वाचन तथा २०७९ मंसिर ४ गते प्रतिनिधि सभा र प्रदेश सभा सदस्यको निर्वाचन सम्पन्न भएपश्चात् स्थानीय तह, प्रतिनिधि सभा र प्रदेश सभा सदस्यका २३ पदहरू रिक्त भएको जानकारी गराएकाे छ ।
आयाेगका प्रवक्ता एवम् सहसचिव शालिग्राम शर्मा पौडेलले प्रेस विज्ञप्ती जारि गर्दै रिक्त रहेकाे उक्त पदहरूमा कानून बमोजिम उपनिर्वाचन मार्फत पदपूर्ति गर्नुपर्ने अवस्था रहेको त्यसकाे लागि आन्तरिक तयारी थालिएकाे जानकारी गराएका छन् ।
आयाेगले जारि गरेकाे विज्ञप्तीमा उपनिर्वाचनद्वारा पदपूर्ति गर्न आयोगले नेपाल सरकारसँग परामर्श गरी उपयुक्त समयमा कानून बमोजिम उपनिर्वाचनको मिति तोक्ने गरी आन्तरिक तयारी प्रारम्भ गरेको छ । मतदाता नामावली ऐन, २०७३ को दफा ४ (२) बमोजिम निर्वाचनको मिति तोकिएपछि सोही मितिदेखि उक्त निर्वाचन प्रयोजनका लागि मतदाता नामावलीमा नाम दर्ता गर्ने कार्य स्थगित गर्नुपर्ने कानूनी व्यवस्था रहेको छ ।
आयोगले नियमितरुपमा प्रदेश तथा जिल्ला निर्वाचन कार्यालयहरू मार्फत मतदाता नामावली दर्ता गर्ने कार्य गर्दै आएको छ । साथै नागरिकको सहजताको लागि बाह्य जिल्लाबाट मतदाता नामावली दर्ता गर्न सकिने सुविधा समेत उपलब्ध गराएको छ ।
मतदाता दर्ता सम्बन्धी विद्यमान व्यवस्था बमोजिम देशभरका योग्यता पुगेका सबै नेपाली नागरिकहरूको मतदाता नामावलीमा नाम दर्ता भएकै छ भन्नेमा आयोग विश्वस्त छ । तथापि, विभिन्न कारणले मतदाता नामावलीमा नाम दर्ता गर्न छुट भएका देशभरका र विशेषतः पद रिक्त भएका देहायका स्थानीय तह, प्रदेश सभा निर्वाचन क्षेत्र र प्रतिनिधि सभा निर्वाचन क्षेत्रभित्रका योग्यता पुगेका नेपाली नागरिकलाई उपनिर्वाचनको मिति घोषणा हुनुपूर्व नै मतदाता नामावलीमा नाम दर्ता गर्न आयोग आह्वान गर्दछ । उल्लेख गरिएकाे छ ।
मतदाता नामावलीमा आफ्नो नाम दर्ता तथा अद्यावधिक गर्ने कार्यमा सरिक भई आफ्नो मताधिकार सुरक्षित गर्नुहुन आयोग सम्बन्धित सबैमा विज्ञप्ती मार्फत आग्रह समेत गरेकाे छ ।
मधेश प्रदेशकाे राैतहट जिल्लाकाे इशनाथ नगरपालिकाकाे वडा नं. ७ का वडाध्यक्ष र राैतहट कै राजपुर नगरपालिकाकाे वडा नं. ६ का वडाध्यक्षकाे पद रिक्त रहेकाे छ ।
यसैगरी काेशी प्रदेशकाे इलाम निर्वाचन क्षेत्र नं. २ काे प्रतिनिधि सभा सदस्य र सुनसरीकाे गढी गाउँपालिका वडा नं. ६ र उदयपुरकाे त्रियुगा नगरपालिकाकाे वडा नं. १२ का वडाध्यक्ष पद रिक्त रहेकाे छ ।
त्यसैगरी बागमती प्रदेशकाे काठमाडाैं जिल्लाकाे किर्तिपुर नगरपालिका ४, काठमाडाैं महानगरपालिकाकाे वडा नं. १६, नुवाकाेटकाे ककनी गाउँपालिकाकाे वडा नं. २, मकवानपुरकाे हेटाैडा उपमहानगरपालिकाकाे वडा नं. १२ का वडाध्यक्ष र दाेलखाकाे गाैरीशंकर गाउँपालिकाकाे उपाध्यक्ष लगायतका पद रिक्त रहेकाे निर्वाचन आयाेगले जनाएकाे छ ।
यी पदहरु रिक्त रहेकाे सबै ठाउँमा मतदाता नमावलीमा नाम दर्ता गराउनकाे लागि निर्वाचन आयाेगले आह्वान गरेकाे हाे ।
