वीरगंज । पर्साको वीरगंज लगायत तराइ/मधेशका जिल्लाहरुमा चिसो बढ्दै गएको छ । केही दिनदेखि बढ्दै गएको चिसोका कारण जनजिवन प्रभावित भएको छ । मध्य तराईको बारा, पर्सा, रौतहट लगायतका जिल्लाहरूमा बाक्लो हुस्सुसहित चिसो हावा चल्न थालेको छ । चिसो बढेसँगै तराईका जिल्लाहरुमा विरामी पनि बढ्न थालेका छन् ।
तराईका जिल्लाहरुमा केही दिनयता चिसो ह्वात्तै बढेको छ । एक साताअघिदेखि तराईमा शितलहर चल्न थालेको छ । कठ्याङ्ग्रिदो चिसोका कारण सर्वसाधारणको दैनिकी कष्टकर बन्दै गएको छ । बाक्लो हुस्सुसँगै शीतलहरका कारण कारण दैनिक ज्यालादारीमा काम गर्नेहरु मजदुरहरु बढी प्रभावित भएका छन् । दिनभरि काम गरी एक छाक टार्ने विपन्न समुदायका परिवार आगो तापेर दिन बिताउन बाध्य छन् । कठ्याङ्ग्रिदो चिसोले गर्दा यहाँका समुदाय गल्ली गल्ली र चोक चोकमा आगो तापेर बसिरहेका भेटिन्छन् । शितलहरसँगै चल्ने चिसो हावा चल्न थालेपछि जनजीवन कष्टकर बनिरहेको छ ।
तराईका जिल्लाहरुमा रातिको समयमा चिसो हावा चल्नुका साथै बिहान बाक्लो हुस्सु लाग्ने गरेको छ । लगातार बढदै गएको चिसोले सबै भन्दा बढी वृद्धवृद्धा तथा वालवालिका प्रभावित छन् । चिसोको कारण तराईमा विरामीको संख्या समेत बढेको छ । चिसोको कारण निमोनिया, कोल्ड डाइरिया, रुघाखोकी, ज्वरोका विरामीहरु बढेका छन् । दम, पक्षघात, पारालाइसिसजस्ता रोगबाट वृद्ध–वृद्धा बढी प्रभावित भएको चिकित्सकहरु बताउँछन् । चिसो बढेसँगै नारायणी उपक्षेत्रीय अस्पताल वीरगञ्जमा विरामीको संख्या बढ्दै गएको छ ।
तराईका जिल्लामा गरिव तथा दलित वस्तिका बासिन्दा चिसोबाट बढी प्रभावित भएका छन् । चिसो बढेसँगै पर्साको वीरगन्ज महानगरपालिकाले नगर क्षेत्रमा दाउरा तथा विपन्न समुदायलाई न्यानो कपडावितरण अभियान चलाउने तयारी गरेको छ । फुसको घरमा बस्ने तथा न्यानो ओढ्ने–ओछ्याउने नभएका विपन्न परिवार चिसोले बढी प्रभावित छन् । शरीर ढाक्ने न्यानो कपडा नभएका अति विपन्न परिवारहरु चिसो छल्न घुर बालेर आगो ताप्न थालेका छन् ।
