पर्सा । हजुर बुवाकाे हत्या गरेकाे आराेपमा प्रहरीले ठोरी गाउँपालिकाकाे वडा नं. २ गौतम नगरको डाँडा टोल निवासी ३६ वर्षीय कृष्ण बहादुर खड्कालाई पक्राउ गरेकाे छ ।
खड्काले आइतबार दिउँसो ४ बजे कोदो कुट्ने लाठोले प्रहार गरेर आफ्ना ८२ वर्षीय हजुरबुबा लक्ष्मण लामाको हत्या गरेकाे प्रहरीले जनाएकाे छ ।
लाठो प्रहारबाट गम्भीर रूपले घाइते भएका लामाको उपचारकाे लागि अस्पताल लाँदालाँदै बाटोमै मृत्यु भएको ईलाका प्रहरी कार्यालय ठोरीका प्रहरी निरीक्षक सन्तोष राईले जानकारी दिए ।
इन्स्पेक्टर राईका अनुसार लाठो प्रहारबाट लामा लडेपछि खड्का घटनास्थलबाट फरार भएका थिए ।
यद्यपि स्थानीयहरूको सहयोगमा उनलाई आइतबार नै नजिकैको सिसौ घारीमा लुकेर बसिरहेको अवस्थामा नियन्त्रणमा लिइएको जिल्ला प्रहरी कार्यालयका डिएसपी कुमार बिक्रम थापाले वताए ।
मृतक लामाको शव पोस्टमार्टमका लागि वीरगंजस्थित नारायणी अस्पतालमा राखिएकाे र घटना बारे थप अनुसन्धान भइरहेकाे डिएसपी थापाले जानकारी दिए ।
