वीरगंज । ७ वर्षीया बालिकालाई बलात्कार गरेको आरोपमा महाेत्तरीकाे गौशाला नगरपालिका–११ बटुवा टोलका ३३ वर्षीय जुगल किशोर साहलाई इलाका प्रहरी कार्यालय गाैशालाले गिरफ्तार गरेको छ ।
आरोपित गौशाला नगरपालिका–५ स्थित गौशाला एकेडेमी विद्यालयका संचालक तथा शिक्षक साह विरुद्ध पीडित पक्षले मङ्सिर ८ गते इलाका प्रहरी कार्यालय गौशालामा उजुरी दिएको इष्पेक्टर मनोज कुमार यादवले जानकारी दिए ।
पीडितलाई मङ्सिर ७ गते ४० रुपियाँ दिएर ललाईफकाई गरी टिफिनको समयमा आरोपितले बलात्कार गरेको पीडितको भनाइ रहेकाे छ ।
त्यस्तै, विद्यालयबाट घर फर्के पछि पीडितकाे अवस्था सामान्य नरहेको कारण प्रहरीले पीडित पक्षबाट घटनाबारे सूचना पाए लगतै आरोपित साहलाई गिरफ्तार गरेको जिल्ला प्रहरी कार्यालय महाेत्तरीका डिएसपी दिलिप कुमार गिरीले बताए ।
साथै महोत्तरी जिल्ला अदालतबाट पाँच दिनको म्याद थप गराइ अनुसन्धान भइरहेकाे डिएसपी गिरीले जानकारी दिए । पीडितको स्वास्थ्य परीक्षण मङ्सिर ८ गते प्रादेशिक अस्पताल जलेश्वरमा गरीएको थियाे ।
यसैगरी, २६ वर्षीया महिलालाई बलात्कार प्रयास गरेको आरोपमा सप्तरीकाे शम्भुनाथ नगरपालिका-५ मोहनपुरका ४९ वर्षीय दिपेन्द्रकुमार चौधरी गिरफ्तार भएका छन् ।
जिल्ला प्रहरी कार्यालयमा मङ्सिर ७ गते उजुरी दर्ता गर्दै आरोपितलाई गिरफ्तार गरिएको डिएसपी ढुण्डीराज नेउपानेले बताए । घरमै सञ्चालन गरेको पीडितको पसलमा मङ्सिर ३ गते आरोपितले बलात्कार प्रयास गरेको भन्दै पीडितले मङ्सिर ७ गते उजुरी दिएका थिइन ।
पीडितको राजविराजस्थित गजेन्द्रनारायण सिंह अस्पतालमा मङ्सिर ७ गते स्वास्थ्य परीक्षण गरिएकाे थियाे ।
