वीरगंज । नेपाली युवा उद्यमी मञ्च (एनवाइईएफ) वीरगंजले आइतबार वीरगंजस्थित घरेलु तथा साना उद्योग कार्यालय वीरगंजका प्रमुख धनञ्जय कुमार सिंहसँग छलफल गरेको छ ।
वीरगंजमा आयाेजना हुने रात्री बजारकाे बिषयमा भएकाे छलफलकाे क्रममा एनवाइईएफले रात्रि बजारमा लाग्ने स्टलमा स्थानीय उद्योगहरूले उत्पादन गर्ने बस्तु र उनीहरूले प्रदान गर्ने सेवालाई विशेष महत्त्व दिइने सहमती भएकाे छ ।
घरेलु तथा साना उद्योग कार्यालय वीरगंजका प्रमुख धनञ्जय कुमार सिंहले रात्री बजारमा सक्दाे सहयाेग गर्ने बताए । प्रमुख सिंहले घरेलु तथा साना उद्योग कार्यालयले २० वटा स्टलमा पर्सा जिल्लाका विभिन्न स्थानमा सञ्चालित उद्योगहरूको उत्पादनलाई प्रदर्शनीमा राख्ने प्रतिबद्धता जनाए ।
सिंहले सुरक्षाको दृष्टिकोणले रात्रि बजार चुनौतीपूर्ण हुनसक्ने बताउँदै त्यस तर्फ ध्यान पुर्याउन पनि आग्रह गरे । उनले रात्रिको समयसँगै दिउँसो पनि बजारलाई खुल्ला राख्दा वीरगंज बाहिरबाट आउने मानिसले पनि स्थानीय उत्पादन खरिद गर्न सक्ने बताए ।
एनवाइईएफ वीरगंजका अध्यक्ष सन्दीप अग्रवालले रात्री बजारमा घरेलु तथा साना उद्योग कार्यालयको सहयोग महत्त्वपूर्ण रहने बताए । अग्रवालले अन्य मुलुकमा उत्पादन हुने बस्तुभन्दा पनि स्वदेशी उत्पादनलाई स्टल बुकिङमा विशेष प्राथमिकता समेत दिइने बताए ।
छलफलमा एनवाइईएफको तर्फबाट दुतिय उपाध्यक्ष विश्वास प्रताप शाह, कार्यसमिति सदस्यहरू दिपल खन्ना, विकास ठाकुर, अक्षत शाह, किशन क्याल, साधारण सदस्य आशु कुमार सर्राफ, सञ्चारकर्मी शम्भु कुमार सुमन लगायतको सहभागिता थियो ।
नेपालहरूको ठूलो पर्वमध्येको एक दसैँमा वीरगंजमा आयोजना हुन लागेको पाँच दिने रात्रि बजारको तयारीकाे क्रममा सह आयाेजक समेत रहेका एनवाईएफले घरेलु तथा साना उद्याेग कार्यालयसंग छलफल गरेकाे हाे ।
वीरगंज महानगरपालिकाले स्थानीय सङ्घ संस्थाहरूसँगको सहकार्यमा आयोजना गर्न लागेको पाँच दिने रात्रि बजारको तयारी स्वरूप स्टल बुकिङदेखि सरोकारवाला निकायसँगको छलफल तीव्र पारेकाे हो ।
एनवाइईएफले नेपाली उत्पादन तथा सेवालाई प्रवर्द्धन र प्रचार प्रसारका लागि नेपाल उद्योग वाणिज्य सङ्घको महत्त्वाकाङ्क्षी परियोजना “मेड इन नेपाल” लाई प्राथमिकता दिइरहेको छ ।
