वीरगंज । युवा पत्रकार स्वर्गीय नरेश सर्राफको परिवारलाई वीरगंज महानगरपालिकाले आर्थिक सहयोग गरेको छ । सर्राफकी छोरी श्रेया सर्राफको पठनपाठन तथा भरण पोषणका निमित्त वीरगंज महानगरपालिकाले आर्थिक सहयोग गरेको हो ।
वीरगंज महानगरपालिकाका मेयर राजेशमान सिंहले स्व. पत्रकारकाे श्रद्धान्जली सभामा घाेषणा गरे अनुसार महानगरबाट रु ५ लाख सहयाेग गरेका हुन् । साे रकम पत्रकार स्व. सर्राफकाे ७ बर्षिय छाेरी श्रेया सर्राफकाे नामले फिक्स डिपाेजिट गरिने छ ।
सोका निमित्त शुक्रकार स्व. सर्राफकी छोरी श्रेयालाई जनता समाजवादी पार्टी नेपाल (जसपा) का प्रमुख सचेतक एवम् पर्सा निर्वाचन क्षेत्र नम्बर १ का प्रतिनिधिसभा सदस्य प्रदीप यादव र वीरगंज महानगरपालिकाका मेयर सिंहले पाँच लाख रुपैयाँ बराबरको चेक हस्तान्तरण गरेका हुन् ।
महानगरका मेयर सिंहको कार्यकक्षमा बोलाएर छाेरी श्रेया र स्व. सर्राफकी श्रीमती पूजा कुमार साहलाई चेक हस्तान्तरण गरिएको थियो ।
चेक हस्तान्तरण गर्दै पूर्व वन तथा वातावरण मन्त्री समेत रहेका सांसद यादवले आगामी दिनमा पनि स्वर्गीय पत्रकार सर्राफको परिवारलाई सहयोग गर्ने प्रतिबद्धता व्यक्त गरे । सर्राफ एक होनहार तथा इमानदार पत्रकार रहेको बताउँदै यादवले उनको विरासतलाई अन्य सञ्चारकर्मीहरूले निरन्तरता अगाडि बढाउनु पर्नेमा जोड दिए ।
त्यस्तै वीरगंजका मेयर सिंहले सर्राफको निधन पश्चात् उनको परिवार बिचल्लीमा पर्न नदिन आफूले हरेक सम्भव प्रयास जारी राखेको बताए । सोही प्रयास स्वरूप आज पाँच लाख रुपैयाँ उपलब्ध गराइएको र आगामी दिनमा आवश्यक परे थप सहयोग गर्ने उनले पनि प्रतिबद्धता व्यक्त गरे ।
यसैबिच नेपाल पत्रकार महासङ्घ पर्सा शाखाले स्व. सर्राफको स्मृतिमा स्थापना गरेको अक्षय काेषमा पनि महानगरले रु १० लाख सहयाेग गरेकाे छ । मेयर सिंहले रु १० लाखकाे चेक पत्रकार महासंघ पर्सालाई उपलब्ध गराएका हुन् ।
उनले शुक्रबार एक कार्यक्रमका बिच रकम बराबरको चेक महासङ्घ पर्साका अध्यक्ष अनुप तिवारी र कोषाध्यक्ष सञ्जीव मिश्रलाई हस्तान्तरण गरेका हुन् ।
पत्रकार सर्राफको गत वर्ष मङ्सिर १५ गते हृदयाघातका कारण अल्पायु मै निधन भएको थियो । समाजवादी प्रेस संगठन पर्सा र रेडियाे वीरगंजले संयुक्त रुपमा आयाेजना गरेकाे स्व. सर्राफकाे श्रद्धान्जली सभामा मेयर सिंहले स्व सर्राफकाे नाम स्थापना हुने अक्षय काेषमा रु १० लाख र उनकाे छाेरीकाे नामले रु ५ लाख फिक्स डिपाेजिट गरिदिने घाेषणा गरेका थिए ।
साेही घाेषणा अनुसार मेयरले सिंहले शुक्रबार साे रकम बराबरकाे चेक हस्तान्तरण गरेका हुन् । साेही श्रद्धान्जली सभामा समाजवादी प्रेस संगठन र रेडियाे वीरगंजले स्व. सर्राफकाे छाेरीकाे नाममा फिक्स डिपाेजिट गर्न रु एक/एक लाख सहयाेग समेत गरेका थिए ।
