वीरगंज । वीरगंजकाे मुख्य नालामाथी निर्माण भएको घर र नालाको अतिक्रमणले मुख्य नालाको सफाइमा बाधक बनेको छ । वर्षायाम लाग्न अधि वीरगंजकाे मुख्य नालाहरु सफा गर्ने क्रममा नालामाथी बनेको घर र संरचनाले सफाई अभियानमा बाधा परेकाे हाे ।
आदर्शनगरस्थित कर्पोरेट डेभलपमेन्ट बैंक रहेको घर, क्लासिक होटल रहेको घर, हरिखेतान कलेज सहितको घरहरु नालामाथी बनेको छ । वर्षौदेखी सफा हुन नसकेको मुख्य नाला अहिले वीरगंज महानगरपालिकाले चेन स्काभेटर र सरसफाइ कर्मचारीले सफाई गर्न सुरु गरेको छ ।
यसैबिच वीरगंज महानगरपालिकाका मेयर राजेशमान सिंहले मुख्य नाला सफाईको अनुगमन गरेका छन् । अनुगमनकाे क्रममा नालामाथिको अवैध र अतिक्रमीत संरचना हटाउन र नाला सफाई नरोक्न मेयर सिंहले निर्देशन समेत दिएका हुन् ।
नालामाथी बनेको केही घरको कारण सफाइ हुन नसकेको देखिएको मेयर सिंहले बताए । नालामाथी बनेको घर र संरचनाले वर्षायाममा पुरै बजार डुवानमा पर्ने गरेको छ । एकैछिनको वर्षाले जलमग्न हुने जिल्ला प्रशासन कार्यालय पर्सा (सिडिओ अफिस) नजिकको नाला दुई दशकपछी सफा भएको छ ।
नाला सफा गर्नका लागि सिडिओ अफिस बाहिरको पर्खालसमेत भत्काउनु परेको महानगरपालिकाको सरसफाई शाखा प्रमुख सर्फुदिन मियाँले बताए । नाला सफा गरिएसँगै डुबानको जोखिम कम भएको र भएपनि विगतको जस्तो नहुने मियाँको विश्वास छ ।
