वीरगंज । प्रदेशसभा पर्सा निर्वाचन क्षेत्र नं. २ (१) मा बाम लाेकतान्त्रिक गठबन्धनका उम्मेदवरा नेपाली कांग्रेसका श्याम पटेल निर्वाचित भएका छन् । निकटतम प्रतिद्वन्दी जनता समाजवादी पार्टी (जसपा) नेपालका रामनरेश प्रसाद यादवलाई एक हजार ६ सय ५७ मतले हराउँदै पटेल विजयी भएका हुन् ।
कांग्रेस पर्साका पूर्व जिल्ला सचिव समेत रहेका पटेलले १३ हजार ७ सय ७४ मत प्राप्त गरी विजयी हुँदा जसपाका यादवले १२ हजार एक सय २७ मत पाएका थिए । यादव एमाले-जसपा गठबन्धनका सांझा उम्मेदवार थिए । यस अघिकाे निर्वाचनमा पनि यस क्षेत्रमा कांग्रेसका राजेश्वर प्रसाद साहले यादवलाई नै हराउँदै विजयी भएका थिए । दाेस्राे पटक हार ब्याेहाेरेका यादव जसपा पर्सा अध्यक्ष समेत हुन् ।
प्रदेशसभा सदस्यमा निर्वाचित पटेल युवाहरुको माझमा पनि लोकप्रिय छन् । यसअघिको निर्वाचनमा उनले टिकट पाएका थिएनन् । त्यस्तै कांग्रेस पर्साकाे जिल्ला अधिवेशनमा जिल्ला सभापतिमा उम्मेदवारी दिएका पटेल संस्थापन पक्षका जनार्दन सिंह क्षेत्रीसँग पराजित भएका थिए ।
उनी प्रदेशसभा निर्वाचित भएकाे खुशियाली मंगलबार सांझ मतगणना स्थल ठाकुर राम बहुमुखी क्याम्पसबाट विजयी समेत निकालिएकाे थियाे । वीरगंज नगरकाे बजार क्षेत्रमा परिक्रमा गर्दै उनकाे निवास सम्म पुगेका विजयी जुलुशमा सयाैंकाे संख्यामा उनकाे समर्थकहरुकाे सहभागिता रहेकाे थियाे ।
यसैगरी यस क्षेत्रका प्रदेशसभा सदस्यका राप्रका उम्मेदवार हरि प्रसाद चाैधरी एक हजार ७ सय ४१ मत, स्वतन्त्र उम्मेदवार स्याङबाे लामा तामाङ् एक हजार २ सय ८८ मत, अर्का स्वतन्त्र उम्मेदवार जिवन श्रेष्ठ ५ सय ४६ मत, नेपाल लाेकतान्त्रिक पार्टीका मनाेज प्रसाद यादव ४०१ मत, अर्का स्वतन्त्र उम्मेदवार गाेपिचन्द प्रसाद यादव १३१ मत, फरमान अन्सारी ३५ मत र अब्दुल गाेयुम अंसारी ३३ मत पाएका छन् ।
