वीरगंज । पर्साको जगरनाथपुर गाउँपालिकामा भूमि सम्बन्धी एक दिने अभिमुखीकरण सम्पन्न भएको छ । भुमिहिन दलित, भुमिहिन सुकुम्बासी, अव्यवस्थित बसाेबासीकाे समस्या समाधानकाे बारेमा पालिका स्तरिय एक दिने अभिमुखिकरण सम्पन्न भएकाे हाे ।
गाउँपालिकाकाे सभा हलमा भएकाे अभिमुखिकरण कार्यक्रममा गाउँपालिकाका जनप्रतिनिधीहरुलाई अभिमुखीकरण दिइएको राष्ट्रिय भूमि आयोग पर्साका अध्यक्ष तबरेज अहमदले वताए ।
‘हाम्रो अभियान भूमिहीन दलित, भूमिहीन सुकुम्बासी र अव्यवस्थित बसोबासीको समस्या समाधान हाम्रै पालामा’ भन्ने नारालाई साकार पार्न राष्ट्रिय भूमि आयोग पर्साले अभिमुखीकरणको आयोजना गरेको आयोगका अध्यक्ष अहमदले जानकारी दिए ।
वडामा सहजीकरण समिती र पालिकामा सेवा केन्द्र स्थापना गर्न गाउँपालिका अध्यक्ष श्रीकान्त यादव पनि सकरात्मक रहेको उनले वताए । भूमिहिन र अव्यवस्थित बसोबासीको समस्या समाधानका लागि पालिकाबाट सक्दो पहल गर्ने प्रतिबद्धता जनाउँदै गाउँपालिका अध्यक्ष यादवले भूमि आयोगका कामलाई सहयोग गर्ने प्रतिबद्धता जनाएकाे आयाेगका अध्यक्ष अहमदले जानकारी गराए ।
भूमिहिन, सुकुम्बासी, दलित एवम् अव्यवस्थित बसोबासीहरुको पहिचान कसरी गर्ने, कसलाई भूमि उपलब्ध गराउने, सूचना कसरी संकलन गर्ने लगायतका बारेमा आयोग पर्साका अध्यक्ष अहमद र आयोगका सदस्य सुरेन्द्र सिंहले सहभागीहरुलाई प्रशिक्षण दिएका थिए ।
सोही अवसरमा भूमि सम्बन्धी कामको सहजताका लागि पालिकास्तरीय र वडास्तरीय सहजीकरण समिती गठन गर्ने निर्णय पनि गरिएको छ । आयोगका अध्यक्ष अहमदका अनुसार पालिकामा राष्ट्रिय भूमिहिन सेवा केन्द्र सञ्चालन गर्ने निर्णय पनि भएको छ ।
आयोग पर्साका अध्यक्ष तबरेज अहमदको अध्यक्षतामा भएकाे कार्यक्रममा गाउँपालिका अध्यक्ष श्रीकान्त प्रसाद यादव, उपाध्यक्ष बबिता सिंह क्षेत्री, प्रमुख प्रशासकिय अधिकृत कृष्णनन्दन राय, वडाध्यक्ष र कार्यपालिका सदस्यहरुको उपस्थिती रहेको थियो ।
