वीरगंज । मधेश प्रदेश सरकारले आर्थिक वर्ष २०७९/८० को नीति तथा कार्यक्रम प्रस्तुत गर्न लागेको छ । जेठ २१ गते शनिबार बस्ने प्रदेशसभा बैठकमा सरकारले नीति तथा कार्यक्रम प्रस्तुत गर्ने भएको हो ।
प्रदेश प्रमुख हरिशंकर मिश्रले सरकारको नीति तथा कार्यक्रम प्रस्तुत गर्ने मधेश प्रदेश सरकारका गृह तथा सञ्चारमन्त्री भरतप्रसाद साहले जानकारी दिए ।
नीति तथा कार्यक्रममाथिको छलफल सम्पन्न भएपछि असार १ गते प्रदेश सभामा सरकारको बजेट पेश गर्नुपर्ने संवैधानिक व्यवस्था भएकाले सोही अनुसारको तयारीमा सरकार लागिपरेको उनले बताए । नीति तथा कार्यक्रममा छोरी शिक्षा बीमा कार्यक्रमलाई प्राथमिकताका साथ ल्याउन लागिएको मुख्यमन्त्री तथा मन्त्रीपरिषद्को कार्यालयले जनाएको छ ।
मधेश प्रदेश सरकारले कृषि, सिँचाई, स्वास्थ्य, पूर्वाधारको विकासमा जोड दिने समेत मन्त्री साहले जानकारी दिए । बजेट प्रस्तुत गर्नुअघि प्रि–बजेट पनि ल्याउने तयारीमा मधेश प्रदेश सरकारको अर्थ मन्त्रालय लागि परेको हो ।
त्यसअघि प्रदेशसभा सचिवालयले जेठ १९ गते बिहीबार दिउँसो १ बजे प्रदेशसभाको नवौं अधिवेशन आह्वान गरेको छ ।
