वीरगञ्ज । बाराको जितपुर सिमरा उपमहानगरपालिका वडा नम्बर २३ मा वडाअध्यक्षका आकांक्षीहरुबिच झडप भएको छ । वर्तमान वडाअध्यक्ष अस्लम देवान र आसन्न स्थानीय तहको निर्वाचनमा वडाअध्यक्षका आकांक्षी मुस्तकिम अंसारीबिच झडप हुँदा दुवै पक्षका गरेर ८ जना घाइते भएका छन् ।
भलुहि टोलमा कोईला डिपो अगाडि बाँसले घेरेर बन्द गरिएको बाटो खुलाउन गएका मुस्तकिम अंसारीसहितको टोलीलाई वडा अध्यक्ष असलम देवान लगायतको टोलीले गाली गलोज गर्दा विवाद शुरु भएको प्रत्यक्षदर्शीले बताएका छन् ।
सामान्य भनाभनपछि असलम देवान पक्षका व्यक्तिहरू मुस्तकिम अंसारी पक्षको समुहमाथि हातपात गर्दा असलम देवान पक्षको समूहले कुटपिट गरेको हो ।
कुटपिटबाट मुस्तकिम अंसारीसहित चाद महम्मद मंसुरी, मुमताज आलम, यासिन मिया, तमिजुदिन अंसारी, खुरशेद आलम लगायत घाइते भएका छन् । चांद महम्मद मंसुरी र ममताज आलमको आईसियुमा उपचार भइरहेको छ । यासिन मियाँको खुट्टा भाँचिएको र खुरशेद आलमको हात भाँचिएको छ भने अन्यको अवस्था सामान्य रहेको अस्पताल श्रोतले जनाएको छ ।
घटनामा संलग्न हरूकाे खाेजी कार्य भई रहेको
जिल्ला प्रहरी कार्यालय बाराले जनाएको छ ।
उता अस्लम देवानसहित उनका दाजु भाई गरी ३ जना सामान्य घाइते भएका छन् । उनीहरुको वीरगञ्जस्थित नारायणी वयोद्या अस्पतालमा उपचार भइरहेको जिल्ला प्रहरी कार्यालय बाराका प्रवक्ता एवम् प्रहरी नायब उपरीक्षक राजेश थापाले बताए ।
