बीरगंज । नेपाली कांग्रेस वीरगंज महानगरपालिकाको सभापति पदमा ३ जनाकाे उम्मेदवारी परेकाे छ । काँग्रेसको १४ औँ नगर अधिवेश अन्तर्गत वीरगंज महानगर सभापतिकाे लागि शुक्रबार पार्टी कार्यालय रामगढवामा छुट्टाछुट्टै उम्मेदवारी दर्ता भएको हाे ।
पार्टी सभापति शेरबहादुर देउवा प्यानलबाट राधेश्याम चौरसियाको टिमले उम्मेदवारी दिएको छ भने शेखर कोइराला प्यानलबाट मणिन्द्रलाल श्रेष्ठको प्यानल खडा भएको छ ।
यसैगरी, नेपाल पत्रकार महासङ्घका केन्द्रिय सचिव दिपेन्द्र चौहानले समेत सभापति पदमा उम्मेदवारी दिएका छन् । चौहानको भने कुनै प्यानल रहेको छैन ।
देउवा प्यानलबाट उप सभापतिमा ध्यक्षमा विजय सिंह, सरजुग महतो, सचिवमा धिरज कुमार गुप्ता, श्याम कुमार प्रसाद कुर्मी, सहसचिवमा दिपक कुमार साह र सदाम हुसैन समानीले उम्मेदवारी दिएका छन् भने कोइराला प्यानलबाट उप सभापतिमा सन्तोष कुमार गुप्ता, बृजभूषण प्रसाद पटेल, सचिवमा सञ्जय श्रीवास्तव, शिवचन्द्र प्रसाद यादव, सहसचिवमा जयन्द्र प्रसाद कुर्मी र सम्मसाद अलीले उम्मेदवारी दिएका छन् ।
यता उम्मेदवारी दर्ता गराएका उम्मेदवारहरूले तोकिएको समयभित्र नाम फिर्ता नलिएको र उम्मेदवार विरुद्ध कुनै दाबी विरोध समेत नपरेको कारण भोलि बिहान ९ः०० बजेदेखि आदर्शनगरस्थित बाल मन्दिर परिसरमा मतदान हुने कार्यक्रम रहेको निर्वाचन अधिकृत नरेन्द्र केसीले जानकारी दिए ।
यस्तै, पाेखरिया नगरपालिका र बहुदरमाई नगरपालिकाकाे समिति चयनकाे लागि पनि निर्वाचन हुने भएकाे छ । १४ औ नगर अधिबेशनमा शुक्रबार दुबै नगरपालिकामा उम्मेदवारी दर्ता भएकाे छ ।
