वीरगंज । संसदमा पेश भएको अमेरिकी सहयोग एमसीसी सम्झौताको बिरोधमा विहीबार वीरगञ्जमा प्रदर्शन भएको छ । नेकपा माओवादी केन्द्रका भातृसंगठनहरु अखिल क्रान्तिकारी र वाईसिएलले संसदमा पेश भएको अमेरिकी सहयोग एमसीसी सम्झौताको बिरोधमा प्रदर्शन गरेका हुन् ।
वीरगञ्जको घण्टाघरमा नाराबाजी गर्दै दिउँसो २ बजेदेखि ३ बजेसम्म १ घण्टा चक्काजाम समेत गरिएको अखिल क्रन्तिकारी मधेश प्रदेश सचिव जुबेर आलमले जानकारी दिए । संसद बैठक हाललाई स्थगित गरेकाले फेरी संसद बैठक बस्ने दिन अझ भव्य बिरोधका कार्यक्रमहरु आयोजना गरिने सचिव आलमले बताए ।
बिरोध प्रदर्शन तथा चक्काजाम कार्यक्रममा अखिल क्रान्तिकारी पर्सा जिल्ला अध्यक्ष कविराज पटेल, वाईसिएल केन्द्रीय कमिटी सदस्य तथा पर्सा जिल्ला ईन्चार्ज ओमप्रकाश गुप्ता, वाईसिएल मधेश प्रदेश सदस्य राकेश साह कानु, चन्दन रौनियार लगायतको सहभागिता रहेको थियो ।
