वीरगंज । जनमत पार्टीका अध्यक्ष डा. सीके राउतले किसान आन्दोलनको माँग सम्बोधन गर्न सरकार संग माग गरेका छन् । वीरगंजमा बुधबार पत्रकार सम्मेलन गर्दै अध्यक्ष राउतले माग पुर नभए बैशाख ३० गते हुने भनिएकाे स्थानीय तहकाे निर्वाचनमा अवरोध गर्ने चेतावनी दिए ।
राउतले पत्रकार सम्मेलनमा भने, ‘मुख्य कुरा किसानको मुद्धा हो । किसानको मुद्धामा सरकार संवेदनशिल हुनुपर्छ । त्यसपछि मात्रै स्थानीय तहको निर्वाचनको परिकल्पना गरौं । नत्र तराई मधेशमा झापादेखि बाँके, बर्दिया, कैलाली कञ्चनपुरसम्म अवरोध गर्नेछौं ।’
अहिले मधेशमा राउतको नेतृत्वमा रहेको जनमत पार्टीले किसान आन्दोलन गर्दै आएको छ । कृषि मन्त्री मधेशकै भएपनि किसानको माग सुन्न नचाहेको राउतको आरोप छ । किसानका मुद्धा सम्बोधन गर्न सरकार गम्भिर नभए अर्को चरणको आन्दोलन घोषणा गर्ने समेत राउतले बताए ।
उनले किसानको माँग संगै पार्टीकाे राजनितिक माँग बारे समेत पत्रकार सम्मेलनमा जानकारी गराए । अध्यक्ष राउतले तराई मधेसमा जनसंख्या र मातृभाषाको आधारमा स्थानिय तहको निर्वाचन क्षेत्र कायम गर्नुपर्ने बताए । उनले भने, ‘किसानको माँगलाई पहिलो प्राथमिकतामा राखेका छौ, त्यसपछि राजनितिक माँगलाई अगाडी बढाउँछौ, हामीले राजनितिक माँग बारे सरकारलाई अवगत समेत गराई सकेका छौ ।’
उनले अर्को चरणको किसान आन्दोलन फागुन १ बाट हुने समेत जानकारी दिए । मौसमको खराबीका कारण पुर्वपश्चिम राजमार्ग केन्द्रीत आन्दोलन ग्रामीण क्षेत्रमा सारिएको बताउँदै उनले १ फागुनबाट सशक्त कार्यक्रम आउने बताए ।
कृषिमन्त्री मधेसकै भए पनि किसानको माँग सुन्नसमेत नचाहेको राउतले आरोप लगाए । डेढ महिनादेखि आन्दोलन जारी रहँदा पनि किसानहरुको माँगमा सरकारले चासो नदिएको भन्दै उनले आक्रोश पोखे ।
मधेस प्रदेशले किसानको समस्या समाधान गर्न गठन गरेको उच्चस्तरीय समिति स्वागत योग्य रहेपनि भरोसा लायक नरहेको आरोप समेत उनले लगाए । अध्यक्ष राउतले उच्चस्तरीया समिति गठन त ग¥यो तर किसानको माँग मधेस प्रदेश सरकारको अधिकार भन्दा बाहिर रहेकोले संघीय सरकार संग किसानको माँग सम्बोधन गर्न ज्ञापन पत्र बुझाएको बताए ।
उनले भने, ‘चार बर्षमा, प्रदेश सरकारले कयौं समिति बनायो तर अहिले सम्म प्रतिवेदन सार्वजनिक गर्न सकेको छैन, त्यसैले किसानको माँग सम्बोधन गर्न भनेर बनाईएको उच्चस्तरीय समिति भरोसा लायक छैन ।”
