वीरगंज । नेकपा माओवादी केन्द्र पर्सा जिल्ला समन्वय समितिको बैठकले विभिन्न निर्णयहरु गरेको छ । बैठकले पार्टीको रिक्त रहेको प्रतिनिधिसभा निर्वाचन क्षेत्र नम्बर २ र ४ तथा प्रदेशसभा निर्वाचन क्षेत्रमा ३ जना युवालाई जिम्मेवारी दिएको छ ।
नेकपा माओवादी केन्द्र जिल्ला समन्वय समिति पर्साका अध्यक्ष रामदरश कुश्वाहाको अध्यक्षता तथा जिल्ला इन्चार्ज विजय महतोको अध्यक्षतामा भएको बैठकले प्रतिनिधिसभा निर्वाचन क्षेत्र नम्बर २ को इञ्चार्जमा युवा नेता अमिताभ बच्चन दास ‘रोहित’ लाई जिम्मेवारी दिएको छ ।
त्यस्तै प्रतिनिधिसभा निर्वाचन क्षेत्र नम्बर ४ को इञ्चार्जमा इमदाद गद्दी (सुगा) तथा प्रदेशसभा निर्वाचन क्षेत्र नम्बर २ को (ख) काे संयाेजकमा संतोष पटेललाई जिम्मेवारी दिने निर्णय गरेको छ ।
पार्टीको सम्मेलन तथा संगठन निर्माण नभएको स्थानीय तहहरुमा संगठन निर्माण गर्ने, १४ वटै स्थानीय तहमा पार्टी कार्यालय खोल्ने, नियमित बैठक बस्ने र लेवी प्रति सदस्य २० रुपैंया उठाउने निर्णय गरिएको पार्टीका जिल्ला सचिव बालेश्वर थारुले जानकारी दिए ।
