वीरगंज । जनता समाजवादी पार्टी (जसपा) पर्साकाे विवाद झन चुलिँदै गएको छ। पछिल्लो हप्ता दुई छुट्टाछुटटै समूहले जिल्ला कार्यसमिति गठन र पुनःगठन गरेका थिए । केन्द्रीय अध्यक्ष उपेन्द्र यादवसँग असन्तुष्ट समूहले गत माघ २ गते मन्जुर अन्सारीको नेतृत्वमा नयाँ जिल्ला कार्यसमिति गठन गरेको थियाे ।
उपेन्द्र निकट रहेका पहिलेका अध्यक्ष रामनरेश यादवको समूहले भने गत शुक्रबार छुट्टै भेला गरेर जिल्ला कार्यसमिति पुनःगठन गरेको छ । पर्सामा गठन भएका दुई छुट्टाछुटटै जिल्ला कार्य समितिबारे अहिले आएर जसपाको मधेस प्रदेश समितिमा पनि विभिन्न विवाद देखिएकाले पर्सामा जसपाभित्रको विवाद झन् उत्कर्षमा पुगेको हो ।
जसपाको मधेस प्रदेश समितिका मुख्य सचिव दिनेश कुमार यादवले शनिबारमात्रै एक विज्ञप्ति जारी गरेर पर्सा जिल्लामा राम नरेश यादवले नेतृत्व गरेको जिल्ला कार्य समिति नै पार्टीको आधिकारिक रहेको जनाएको छ ।
पार्टीको मेधश प्रदेश कमिटीले पर्सा जिल्लामा पार्टीको जिल्ला कमिटी बनेको बिषयमा बिभिन्न संचार माध्यमबाट जानकारी प्राप्त भएको समेत बिज्ञप्तिमा उल्लेख छ । बिज्ञप्तिमा जिल्ला पार्टी एकतापछि समायोजनको काम बाँकी रहेको र त्यो घोषणाको जिम्मेवारी प्रदेश समितिमा निहित रहेको उल्लेख छ ।
समायोजनको काम प्रदेशले गर्ने भन्दै बिज्ञप्तिमा पर्सामा पार्टी समायोजनको काम छलफलको चरणमा रहेको भन्दै प्रदेश सभा सदस्य मन्जुर अन्सारीको नेतृत्वमा बनेको समितिलाई अबैध भएको ठहर गरेको छ ।
मधेश प्रदेश समितिका उपाध्यक्ष सुशिल यादवले आइतबार प्रेस विज्ञप्ती जारी गर्दै अब्दुल रहिम (मञ्जुर) अन्सारी अध्यक्ष रहेको जिल्ला समितीले नै वैद्यानिक रहेकाे जनाएका छन् । उपाध्यक्ष यादवले प्रेस विज्ञप्ती जारी गर्दै अन्सारीको अध्यक्षतामा गठीत तदर्थ समितिी नै आधिकारिक भएको दावी गरेका हुन् ।
मधेश प्रदेश समितिका सचिव दिनेश कुमार यादवले जारी गरेको विज्ञप्ती एकलौटी र मनोमानी रहेको बताउँदै उपाध्यक्ष साहले विज्ञप्तीमार्फत आपत्ति जनाएका छन् । झण्डै दुई तिहाई सदस्यको बहुमतका आधारमा गठीत समिति नै आधिकारिक भएको बताउँदै उनले यस विषयमा मधेश प्रदेश समितिको बैठक बसेर छलफल गरी निस्कर्ष निकाल्ने पनि विज्ञप्तीमा उल्लेख गरेका छन् ।
मुख्य सचिव यादवले व्यक्तिगत रुपमा हस्ताक्षर गरेर जिल्ला समितिलाई आधिकारिक हो भनेर भ्रम फैलाएकोमा पनि उनले विज्ञप्तीमार्फत खेद प्रकट गरेका छन् ।
