वीरगंज । पर्सामा राष्ट्रिय जनगणना २०७८ काे लागि ५५६ गणक खटिएका छन् । ’मेरो गणना, मेरो सहभागिता“ नाराका साथ बिहीवारदेखि सुरु भएकाे दाेस्राे चरणकाे मुल जनगणनाकाे लागि पर्सामा गणककाे दरबन्दी ५७० भए पनि ५५६ गणक खटिएका हुन् ।
यस अघि १४२ जना सुपरिवेक्षकहरुले सुचिकरण गरेकाे ९३१४० जनगणना घर संख्याकाे गणकहरुले गणना गर्न घर घरमा पुग्ने जिल्ला जनगणना अधिकारी केशव ज्ञवालीले जानकारी दिए । सपरिवेक्षकहरुकाे सुचिकरण अनुसार पर्सामा जम्मा घर संख्या एक लाख १८ हजार ५ सय १५ रहेकाे छ भने जनगणना परिवार संख्या एक लाख १७ हजार ६ सय २१ रहेकाे छ ।
कात्तिक २५ गते बिहिबारदेखि शुरू भएको जनगणना मङ्सिर ९ गतेसम्म चल्ने छ । प्रभावकारीरूपमा जनगणना गर्नका लागि पर्सा जिल्लामा ६ वटा स्थानिय जनगणना कार्यालय स्थापना गरिएको छ । यसका साथै गणकहरुले गरेकाे कामकाे एक सय ४२ सुपरिवेक्षकहरुले सुपरिवेक्षण र जिल्ला जनगणना कार्यालय तथा स्थानिय जनगणना कार्यालयबाट अनुगमन भइरहेकाे अधिकारी ज्ञावलीले वताए ।
वीरगञ्ज महानगरमा जिल्ला जनगणना कार्यालय पर्सा र महानगरको लागि परवानीपुरमा अर्को कार्यालय स्थापना गरिएको छ । त्यसैगरी, सखुवाप्रसौनी गाउँपालिकालाई समेत हेर्ने गरी पर्सागढी नगरपालिकामा कार्यालय स्थापना गरिएको छ ।
ठोरी, जगरनाथपुर, पटेर्वासुगौली र जीराभवानी गाउँपालिकाको लागि जीराभवानीको सेढवामा कार्यालय सञ्चालनमा आएको छ । धोबिनी, पकाहामैनपुर, कालिकामाई र छिपहरमाई गापाको लागि कालिकामाई गाउँपालिकाको मुडलीमा कार्यालय स्थापना गरिएको जिल्ला जनगणना कार्यालय पर्साका सहायक कर्मचारी अमित खड्काले वताए ।
जनगणनाको पहिलो चरणमा सुपरीवेक्षकले घर सङ्ख्या, परिवार सङ्ख्या, कृषि विवरण, आर्थिक गतिविधि, बैंक खाता आदिका बारेमा सामान्य विवरण सङ्कलन गरी घरको सूचीकरण गरिसकेको र सूचीकरणपश्चात् दोस्रो चरणको गणकले जात, धर्म, संस्कृति, शैक्षिक विवरण, आर्थिक गतिविधि, मृत्युसँग सम्बन्धित विवरण सङ्कलन शुरू गरिरहेको जिल्ला जनगणना अधिकारी ज्ञवालीले जनाए ।
जनगणनामा व्यक्तिगत तथा पारिवारिक विवरण संकलनका लागि ८० वटा प्रश्नसहितको प्रश्नावली बनाइएको छ । यी प्रश्नबाट नेपालको ग्रामीण र शहरी भेगमा बसोबास गर्ने जनसंख्या, उनीहरुको रोजगारीको स्थिति, वित्तीय पहुँच, उमेर आम्दानीको स्थिति, शैक्षिक अवस्था, बसाइसराइको दर लगायतका तथ्यांक संकलन गरिन्छ ।
धर्म, जाति र भाषामा चासाे
राष्ट्रिय जनगणनाकाे लागि गणकहरु घर घरमा पुग्न थालेपछि धर्म, जाति र भाषामा चासाे देखिएकाे छ । पर्सामा विभिन्न भाषाका अगुवाहरु, विभिन्न जाति संगठनहरु र धर्मका अगुवाहरु चासाे देखाएका हुन् ।
विभिन्न भाषा, जाति र धर्मका अगुवाहरु प्रेस विज्ञप्ती नै जारी गरेर यिस्ताे चासाे देखाएका हुन् । कतिपैले समाजिक संजालमा जनणनामा झेल नहाेस् यथार्थमा विवरण संकलन गरियाेस् भने सतर्क समेत गराएका छन् ।
