वीरगंज । प्रहरीले वीरगंजबाट हुन्डी काराेबार गरेकाे आराेपमा एक जनालाई पक्राउ गरेकाे छ । प्रहरी चाैकी इनार्वाबाट खटिएकाे प्रहरी टाेलीले वीरगंज महानगरपालिकाकाे वडा नं.२ बस्ने ४३ बर्षिय महमद आसिफ अंसारीलाई पक्राउ गरेकाे हाे ।
प्रहरी चौकी ईनर्वाबाट वीरगंज महानगरपालिकाकाे वडा नं. १६ शंकराचार्य गेटमा खटिएको नियमित चेकिङ टोलीले आइतबार विहान १०:३० बजे भारतबाट वीरगञ्जतर्फ आउँदै गरेको ना.२५ प ८७६२ नम्बरको डिस्कभर मोटरसाइकललाई रोकी जाँच गर्दा मोटरसाइकलमा सवार अंसारीकाे हेल्मेट भित्र श्रोत नखुलेको नेपाली रू ५ लाख बरामद भएकाे जिल्ला प्रहरी कार्यालय पर्साले जनाएकाे छ ।
मोटरसाइकलसहित अंसारीलाई नियन्त्रणमा लिई जिल्ला प्रहरी कार्यालय पर्सामा ल्याई बैंक तथा वित्तीय संस्था सम्बन्धी ऐन, २०७३ बिरूद्वको कसूरमा अनुसन्धान अगाडि बढाइएको जिल्ला प्रहरी कार्यालय पर्साका प्रवक्ता एवम् प्रहरी नायब उपरिक्षक ओमप्रकाश खनालले वताए ।
