वीरगञ्ज । पर्साको जगरनाथपुर गाउँपालिकाले ४० करोड ५ लाख ४६ हजार रुपैयाँको बजेट ल्याएको छ । गाउँपालिका कार्यालयमा शनिबार आयोजित छैठौं गाउँसभामा बजेट प्रस्तुत गरिएको हो ।
सामाजिक सुरक्षा भत्ता ७ करोड, संघीय र प्रदेश सरकारको वित्तिय समानीकरणबाट प्राप्त हुने रकम क्रमशः ११ करोड ६८ लाख र ७९ लाख ८२ हजार, प्रदेशबाट आउने विशेष अनुदान ३० लाख, समपुरक अनुदान २० लाख, आन्तरिक अनुदान ६ करोड र गरिबसँग विश्वेश्वर कार्यक्रम मार्फत आउने ५ लाख ४६ हजार रुपैयाँ गरी ४० करोड ५ लाख ४६ हजार रुपैयाँको बजेट ल्याइएकाे गाउँपालिकाले जनाएकाे छ ।
बजेटमा स्वास्थ्य, शिक्षा र कृषिलाई प्राथमिकता राखिएको गाउँपालिका अध्यक्ष जालिम मियाँ मन्सुरीले वताए । उनले गाउँपालिकामा आफूले सक्ने विकास गरेको दावी गरे ।
‘एक हजार ५ सय वटा जति योजना केन्द्रबाट आयो, ३ हजारको हाराहारीमा गाउँपालिकाको योजनाबाट काम भएको छ । ५ सय वटा जति योजना प्रदेश सरकारबाट आएको थियो’ उनले भने ‘टोल टोलमा विकास पुगेको छ । पक्की हुन बाँकी रहेको सडक पनि ढलान गरेर आमा, दिदिबहिनी, छोरी बुहारीलाई चप्पल हातमा लिएर हिँड्नुपर्ने अवस्थाको अन्त्य गर्छु ।’
४ हजार जेष्ठ नागरिकलाई छाता, लाइट, कम्बल बाँडिसकेको बताउँदै उनले ८ हजार परिवारलाई ग्याँस सिलिण्डर दिने तयारी भइरहेको सुनाए । उनले आफ्नो नाममा रहेको १४ कठ्ठा जमिन गाउँपालिकालाई दिने घोषणा समेत गरेका छन् ।
गाउँ कार्यपालिका कार्यालयकाे सभा हलमा भएकाे गाउँ सभामा वडाध्यक्षहरु मंगरू राउत गदी, प्रभु प्रसाद नुनिया, गाउँपालिकाकाे याेजना शाखा प्रमुख दिपेन्द्र चाैधरी इन्जिनियर सदाम हुसेन लगायतकाे सहभागिता रहेकाे थियाे ।
गाउँ सभामा उपस्थित ३ दर्जन पत्रकारहरुलाई सम्मान समेत गरिएकाे थियाे । कार्यक्रमकाे संचालन स्वास्थ्य संयोजक प्रबेन्द्र साहले गरेका थिए ।
