बारा । आर्थिक बर्ष २०७८/०७९ काे नीति तथा कार्यक्रम पारित नहुँदै बाराको करैयामाई गाउँपालिकाले बिकास निर्माणकाे कार्य सुरु गरेकाे छ ।
असार १० गते भित्र गरि सक्नु पर्ने गाउँ सभा करैयामाई गाउँपालिकाकाे अझै सम्म हुन नसकेकाे वडा नं. १ वडा अध्यक्ष सोनालाल साहले बताए । गाउँ सभाबाट नीति तथा कार्यक्रम पारित गरेर मात्र नयाँ आर्थिक बर्षमा विकास निर्माण कार्य गर्न पाइने सरकारी नियम भएपनि गाउँपालिकाका अध्यक्ष भुनेश्वर धामीको निर्देशनमा गाउँपालिकाले १ करोड बराबरको लागतमा सडक निर्माण कार्य अगाडि बढाएको वडाध्यक्ष साहले बताए ।
गाउँपालिका अध्यक्ष धामीले गाउँ सभा नै नगरी गाउँपालिकाको वडा नं. ५ र ७ मा पर्ने ढोरियादेखि पिपरा र पिपरादेखि ढोरियासम्मको बाटो निर्माण कार्य अगाडि बढाएर बजेट दुरुपयोग गरेकाे वडाध्यक्ष साहले आराेप लगाए ।
यस विषयमा गाउँपालिकाका अध्यक्ष धामीसँग बुझ्दा उपभोक्ता समिति मार्फत काम भईरहेको तथा ६ सय मिटरको सडक ढलान गर्न दुई वटा उपभोक्ता समिति गठन गरी काम भईरहेको बताए ।
उनले गाउँपालिकाका प्रशासकीय अधिकृतले नियमसंगत ढङ्गले कार्य आदेश दिएको दाबी गरे । गापा अध्यक्ष धामीले गएको आर्थिक वर्षको बाँकी काम १८ नम्बर फाइलमा लगेर गर्न मिल्ने प्रतिक्रिया दिए । तर, गाउँपालिका वडा नं. ५ का वडाध्यक्ष उमेश चौधरीले आफुलाई यसबारे केही थाहा नभएको र आफ्नै वडामा बनाएको उपभोक्ता समिति बारे पनि आफुलाई केही जानकारी नभएको वताए ।
वडाध्यक्ष चौधरीले गाउँपालिकाका अध्यक्षले ठाडो शैलीमा नियम मिचेर काम अगाडि बढाएको बताए । गाउँसभाबाट नीति र कार्यक्रम पारित नभई योजना समेत छनोट भई नसकेको अवस्थामा अध्यक्ष र प्रशासकिय अधिकृतको मिलोमतोमा यस वर्षको बजेट दुरुपयोग भएपछि गाउँपालिकाको बोर्ड सदस्य र कर्मचारीमा चरम असन्तुष्टि रहेको छ ।
बजेट दुरुपयोगबारे चरम असन्तुष्टि रहेपनि आफ्नो वडाको बजेट कटौती हुने डर्रले कसैले पनि कुनै प्रतिक्रिया नजनाएको श्रोतको दाबि छ ।
यता, वडा नं. २ का वडाध्यक्ष सुरेन्द्र चौधरीले गाउँपालिका अध्यक्ष र प्रशासकिय अधिकृतले कुनै न कुनै नियमलाई टेकेर बजेट प्रयोग गरेको हुनसक्ने बताएका छन् ।
यस विषयमाम योजना प्रमुख विरेन्द्र कुशवाहा र वरिष्ठ इन्जिनियर अवधेश प्रसादसँग प्रतिक्रिया लिन खोज्दा प्रष्ट प्रतिक्रिया आएन । उपभोक्ता समिति मार्फत निर्माण कार्य भईरहेको भनिए पनि सडक ढलान ठेकेदार मार्फत भईरहेक स्थानियहरुले वताएका छन् ।
स्थानीयहरुका अनुसार गापा अध्यक्ष धामीले आफ्ना आसेपासेलाई उपभोक्ता समिति बनाएको भए पनि काम ठेकेदार मार्फत नियम विपरित काम गरिरहेका छन् । एकै ठाउँको सडकका लागि करोडौँ बजेट राखेका गापा अध्यक्षले वर्षाको बेलामा पनि जबरजस्ती काम गर्न लगाएर कमसल काम गराएको स्थानीयहरु बताउँछन् ।
तर गापा अध्यक्ष धामीले भने इन्जिनियरको इस्टिमेट अनुसार आफै उपस्थित भएर आरसीसी ढलान गराएकाले काम नियम संगत तवरले भएको दाबी गरे ।
यता, प्रमुख प्रशासकिय अधिकृत यादवले भने आर्थिक वर्षको अन्त्य तीर उपभोक्ता समितिले सबै निर्माण सामाग्री खसालेर काम शुरु गरेको भएपनि वर्षाका कारणले काम सम्पन्न नभएको बताए । सोही कामलाई सम्पन्न गर्न म्याद थप गरेर काम सुचारु गरिएको भएपनि गत आर्थिक वर्षमा सम्पन्न नभएका कामलाई बहुवर्षीय योजनामा परिणत गरी बोर्डबाट अनुमोदन गर्न बाँकी रहेको उनले वताए ।
बोर्डले अनुमोदन नगरेको खण्डमा बजेट निकासामा समस्या हुन सक्ने प्रशासकिय अधिकृत यादवको भनाई छ । उनले जनप्रतिनिधीहरुबीच कुरा नमिल्दा गाउँसभा प्रभावित भएको बताउँदैं छिट्टै गाउँसभा गर्ने तयारी भईरहेको जानकारी दिए ।
गत वर्षका निकासा हुन बाँकी रहेका योजनाहरुको सन्दर्भमा बोर्ड बैठकमा प्रस्ताव गरिने र अनुमोदन भए मात्रै भुत्तानी हुने उनले प्रस्ट पारे । गाउँ सभा नहुँदा अन्य विकास निर्माण कार्य संचालनमा ढिलाई भएकाे छ ।
