वीरगंज । पर्सा प्रहरीले बाल विवाह गर्ने र गराउने ३ जनालाई पक्राउ गरेकाे छ । प्रहरीले पकहा मैनपुर गाउँपालिका वडा नं. १ धाेरेबाट बाल विवाह गर्ने दुल्हासहित ३ जनालाई पक्राउ गरेकाे हाे ।
पक्राउ पर्नेमा पकहा मैनपुर गाउँपालिका वडा नं. १ धाेरे निवासी २४ बर्षिय विशाल सहनी (दुल्हा), साेही ठाउँ निवासी ६५ बर्षिय ठग सहनी र बाराकाे प्रसाैनी गाउँपालिका वडा नं. ५ बेलहिया पनटाेका निवासी ४८ बर्षिय महेश सहनी रहेका छन् ।
ठग सहनी र महेश सहनीले आपसी सहमति गरी १७ वर्षीया बालिका तथा २४ बर्षिय विशाल सहनीको विवाह असार १७ गते धोरेस्थित भुटनदेवी मन्दिरमा गराएकोले वाल विवाह गर्ने तथा गराउने तिनै जनालाई बुधबार पक्राउ गरिएकाे जिल्ला प्रहरी कार्यालय पर्साले जनाएकाे छ ।
पक्राउ परेका तिनै जनालाई बुधबार नै पर्सा जिल्ला अदालतबाट ५ दिन म्याद थप गरी मुलुकी अपराध संहिताको दफा १७३ विपरीत विवाह सम्बन्धी कसूरमा अनुसन्धान अगाडि बढाइएको जिल्ला प्रहरी कार्यालय पर्साका प्रवक्ता एवम् प्रहरी नायब उपरिक्षक ओमप्रकाश खनालले वताए ।
पर्सा जिल्लाका विभिन्न भागमा २० वर्ष पूरा नभएका युवायुवतीले यस किसिमको वालविवाह गर्ने तथा अभिभावकहरूले गराउने गरेको भन्ने जानकारी हुन आएकोले सो सम्बन्धमा जिल्ला प्रहरी कार्यालयको गम्भीर ध्यानाकर्षण भएको जानकारी गराउँदै उनले वालविवाह गर्न लागेको, गरिरहेको वा गरेको जानकारी पाउनुहुने सबैलाई तत्काल प्रहरीलाई खबर गर्न समेत अनुरोध गरे ।
