वीरगन्ज । ‘विद्यालयमा सुरक्षित सिकाई वातावरणका लागि मूलधारको नीति” विषयक जिल्ला स्तरीय अन्तरकृया कार्यक्रम आइतबार वीरगंजमा सम्पन्न भएको छ ।
कार्यक्रमको उदघाटन गर्दै वीरगन्ज महानगरपालिकाका मेयर विजयकुमार सरावगीले हरेक नीति निर्माणमा संघ सरकारको विरोधाभाषपूर्ण अवस्थाका कारणले स्थानीय तहको क्षेत्राधिकार भित्र रहेका शिक्षाको नीति निर्माणमा पनि समस्या हुने गरेको बताए ।
उनले स्थानीयतहहरुले संविधान र कानूनको दायरा भित्र रहेर नीति निर्माण गर्दा समेत संघ सरकारले विभिन्न समयमा निर्देशनात्मक आदेश दिएर त्यस्ता नीतिहरुको कार्यान्वयनमा अवरोध गर्ने गरेको बताए ।
विद्यालयमा बालबालिकाहरुलाई सुरक्षित सिकाईको वातावरण बनाउनु पर्ने बताउदै मनोवैज्ञानिक रुपमा नकारात्मक असर पार्ने खालको वातावरण विद्यालयमा भए त्यसले दक्षजनशक्ति उत्पादन हुन नसक्ने बताए ।
बालबालिकाको सिक्ने प्रारम्भिक थलो नै विद्यालय भएको र भोलीका युवाहरुको भविष्यको आधारशीला पनि विद्यालय नै भएकोले विद्यालयमा सुरक्षितसिकाईको वातवरण हुन आवश्यक रहेको बताए ।
कार्यक्रमा पर्सागढी नगरपालिकाका मेयर लाेकनारायण यादव, पाेखरिया नगरपालिकाकी उम मेयर सलमा खातुन लगायत पर्साका अन्य स्थानीय तहका प्रमुख, शिक्षा समितिका प्रमुख तथा प्रमुख प्रशासकीय अधिकृतहरुको उपस्थिति रहेको थियो ।
