वीरगंज । पर्सा प्रहरीले हुण्डी काराेवारी एक जनालाई पक्राउ गरेकाे छ । पक्राउ पर्ने बाराकाे कलैया उपमहानगरपालिका वडा नं. २३ का ३८ बर्षिय जयराम राउत कुर्मी रहेका छन् ।
जिल्ला प्रहरी कार्यालय पर्साबाट खटिएको प्रहरी टोलीले मंगलबार वीरगंज महानगरपालिकाकाे वडा नं. ६ स्थित जय माँ अम्बे ट्रेडर्सबाट अवैध वित्तीय कारोबार (हुण्डी) मा संलग्न ट्रेडर्समा काम गर्ने कर्मचारी कुर्मीलाई पक्राउ गरेकाे हाे ।
प्रहरीका अनुसार पक्राउ परेका कुर्मीकाे साथबाट सुरुमा स्रोत खुल्न नसकेको नेपाली रु ७ लाख ७५ हजार ४ सय ७०, भारतीय रूपैँया ७ हजार ४ सय, बब्लू राज र रामप्रसाद पटेलको नाममा जारी भएका क्रमश: दुई लाख र पाँच लाख साठी हजार बराबरका चेकहरु बरामद भएकाे थियाे ।
पछि कुर्मीको वयानबाट खुल्न आए बमोजिम उनले काम गर्ने ट्रेडर्समा खानतलासी गर्दा विभिन्न बैंकका विभिन्न व्यक्ति तथा संस्थाका नाममा जारी भएका ३ करोड ५६ लाख ३१ हजार एक सय ४ बराबरका चेकहरू ९० थान बराबद भएकाे जिल्ला प्रहरी कार्यालयका प्रवक्ता प्रहरी नायब उपरिक्षक ओमप्रकाश खनालले वताए ।
यसका साथै ट्रेडर्सबाट विभिन्न बैङ्कका खाली चेकबुक २१ थान र हस्ताक्षर भएका विभिन्न बैङ्कका खाली ४१ थान चेकबुक समेत फेला परेको उनले जानकारी दिए ।
पक्राउ परेका कुर्मीलाई बुधबार पर्सा जिल्ला अदालतबाट बैङ्क तथा वित्तीय संस्था सम्बन्धी ऐन २०७३ बिरूद्धको कसूरमा ५ दिन म्याद थप गरी अनुसन्धान भइरहेको प्रहरीले जनाएकाे छ ।
