वीरगंज । भारतबाट राजश्व छली गरी लुकाई छिपाई राखेको ६५ के.जी.अबैध चाँदीका गर–गहनाहरु बरामद भएको छ ।
पर्सा प्रहरीले वीरगंज महानगरपालिका–६ स्थित सुनिता सर्राफको घरमा मंगलबार छापा मार्दा निजकै नाममा दर्ता रहेको माँ जय नरसिंह ज्वेलर्सको पछाडीको कोठामा भण्डारण गरी राखिएको चाँदीको जस्तो देखिने सेतो धातुबाट बनेको अ ६५ के.जी. गर–गहनाहरु बरामद गरेको हो ।
जय नरसिंह ज्वेलर्सको पछाडीको कोठामा भण्डारण गरी राखिएको भन्ने सूचनाको आधारमा सो घरकोठाको रीतपुर्वक खानतलासी गर्दा उक्त घरमा लुकाई छिपाई राखेको अवस्थामा उक्त चाँदी बरामद भएको जिल्ला प्रहरी कार्यालय पर्साले जनाएको छ ।
बरामद चाँदी करिब रु.५२,००,०००।– (बाउन्न लाख) मूल्य बराबरको रहेको अनुमान गरिएको छ । बरामद चाँदी जिल्ला प्रहरी कार्यालयमा ल्याई थप अनुसन्धान भईरहेको जिल्ला प्रहरी कार्यालयले जनाएको छ ।
अवैध कारोबारमा संलग्न रहेको आशंकामा प्रहरीले सुनिताको श्रीमान दिपक सर्राफलाई पक्राउ गरेको छ । उनी भारतीय नागरिक हुन् ।
