वीरगञ्ज । नारायणी अस्पतालको प्रयोशालामा ४ सय १० जनाको स्वाबकाे नमुना परिक्षण गर्दा १८ जनामा काेराेना सङ्क्रमण पुष्टि भएको छ ।
प्रयाेगशालाले सोमबार अबेर राती गरेको पिसिआर परिक्षणमा १८ र जिन एक्स्पर्ट परिक्षणमा २ जनागरी थप २० जनामा कोरोना सङ्क्रमण पुष्टि भएको हो । तिन जना महिलासहित थपिएका सङ्क्रमित मध्ये १७ जना पर्सा, १ जना बारा र जिन एक्स्पर्ट प्रविधिबाट परिक्षण गरिएका २ जनाको ठेगाना नखुलेको नारायणी अस्पतालका प्रवक्ता डा. अतुलेशकुमार चौरसियाले जानकारी दिए ।
उनले थपिएका सङ्क्रमितहरु २३ वर्षदेखि ६८ वर्ष उमेर समुहका रहेको बताए । जिन एक्स्पर्टबाट परिक्षण गरिएकाहरुको नारायणी अस्पतालको आकस्मिक कक्षमा उपचार चलिरहेको छ ।
पर्साको वीरगञ्ज महानगरपालिकाको वडा नम्बर ८ र १२ का दुई/दुई जना र वडा नम्बर ११, १४,१६ र २५ का एक/एक जनागरी ८ जना, बिन्दबासिनी गाउँपालिकाको वडा नम्बर २ का एक जना, कालिकामाई गाउँपालिका वडा नम्बर ५ का पाँच जना संक्रमित थपिएका छन् । थप दुई जना पर्साका भएपनि निश्चित ठाउँ नखुलेको डा. चौरसियाले जानकारी दिए ।
त्यसैगरी बाराको कलैया उपमहानगरपालिका वडा नम्बर ७ का एक २५ वर्षीय पुरुषमा पनि सङ्क्रमण पुष्टि भएको उनले बताए ।
थपिएका सङ्क्रमितहरु मध्ये ११ जनाको सिटि भ्यालु २४ भन्दा कम रहेको छ भने ७ जनाको २४ भन्दामाथि रहेको डा. चौरसियाले जनाए ।
याेसंगै पर्सामा काेराेना संक्रमितकाे संख्या जिल्ला प्रशासन कार्यालयकाे तथ्यांक अनुसार २ हजार २ सय ११ पुगेकाे छ ।
