वीरगन्ज । नारायणी अस्पताल वीरगंजमा उपचारका क्रममा बिहीबार बिहान मृत्यु भएका दुई पुरुषमा कोरोना संक्रमण पुष्टि भएको छ । कोरोना संक्रमण पुष्टि भएका मृतक दुवै बाराका हुन् ।
बाराको प्रसौनी गाउँपालिका–२ प्रसौनी टोलका ६५ वर्षीय दिनेशप्रसाद कलवारको नारायणी अस्पतालमा उपचारका क्रममा बिहीबार बिहान साढे ८ बजे मृत्यु भएको हो।
४/५ दिनदेखि ज्वरो र खोकीको समस्याले ग्रसित कलवारलाई बुधबार राति दमका कारण श्वासप्रश्वासमा समस्या भएपछि उपचारका लागि नारायणी अस्पतालमा ल्याएर भर्ना गरिएको थियो । उपचारकै क्रममा उनको बिहीबार बिहान साढे ८ बजे मृत्यु भएपछि स्वाब संकलन गरिएको थियो ।
नारायणी अस्पतालकाे प्रयोगशालामा गरिएकाे पिसिआर परिक्षणमा उनकाे रिपाेर्ट पोजिटिभ आएकाे अस्पतालका चिकित्सक डा. उदय नारायण सिंहले जानकारी दिए ।
यस्तै नारायणी अस्पतालमै उपचारका क्रममा बिहीबार बिहान मृत्यु भएका बाराको जितपुरसिमरा उपमहानगरपालिका–४ सिमराका ५० वर्षीय शेख समिमुल हकमा पनि कोरोना संक्रमण पुष्टि भएको डाक्टर सिंहले बताए ।
ज्वरो र खोकी लागेका हकलाई बुधबार दिउँसो उपचारका लागि वीरगन्जस्थित नेशनल मेडिकल कलेजमा लगेर भर्ना गरिएको थियो । तर त्यहा स्वास्थ्यमा सुधार नभएपछि मेडिकल कलेजले नारायणी अस्पतालमा रेफर गरेको थियो ।
स्वास्थ्य अवस्था जटिल बन्दै गएपछि बुधबार साँझ ६ बजे उनलाई अस्पतालको भेन्टिलेटरमा राखेर उपचार गरिएको र बिहीबार बिहान उनको मृत्यु भएको डाक्टर सिंहले जानकारी दिए ।
योसँगै वीरगन्जमा कोरोनाका कारण मृत्यु हुनेको संख्या २५ पुगेको छ । जस मध्ये पर्साका १८ जना छन् भने बारा ५ र राैतहटका एक जना छन् । वीरगंजमा काेराेनाबाट एक भारतिय नागरिककाे पनि मृत्यु भएकाे छ ।
