वीरगंज । आफ्नै छाेरीकाे ज्यान मारी गाडेकाे आराेपमा आमा सहित ४ जनालाई प्रहरीले पक्राउ गरेकाे छ । पर्साकाे पाेखरिया नगरपालिका वडा नं. ९ शिवबर्वाका बिरेन्द्र दास तात्वाकी १५ बर्षिय छाेरी पुनिता कुमारीकाे हत्या आराेपमा आमा सहित ४ जनालाई प्रहरीले पक्राउ गरेकाे हाे ।
पक्राउ पर्नेमा मृतक पुनिताकी आमा शिवकली देवी, काका संताेश दास तात्वा, राजेन्द्र दास तात्वा र स्थानिय जितेन्द्र यादव रहेका छन् । मृतक पुनिताका बुवा बिरेन्द्र फरार भएका छन् ।
इलाका प्रहरी कार्यालय पाेखरियाकाे टाेलीले आफ्नै छाेरीलाई ज्यान मारी गाउँ नजिकै रहेकाे खाेला किनारमा लगी गाडेकाे गाेप्य सुचनाकाे आधारमा अनुसन्धानकाे लागि चारै जनालाई पक्राउ गरेकाे हाे ।
पुनिताकाे घर परिवारका सदस्यहरुले मिली ज्यान मारेकाे सुचनाकाे आधारमा अनुसन्धान गर्न चारै जनालाई पक्राउ गरिएकाे प्रहरीले जनाएकाे छ । पक्राउ परेका चारै जनालाई जिल्ला प्रहरी कार्यालय पर्सामा लगिएकाे छ ।
