वीरगंज । सशस्त्र प्रहरी बल भन्सार राजश्व गस्ती टोलीले चालु आर्थिक वर्षको तीन महिनामा ठूलो परिमाणमा लागुऔषध बरामद गरेको छ । सीमावर्ती भारतीय बजार रक्सौलबाट लुकाई छिपाई भित्र्याएको झण्डै १० हजार भन्दा बढी पिस लागुऔषध डाईजोल्याब, फेनारगन र नोर्फिन तीन महिनाको समयमा बरामद गरेको हो ।
चालु आर्थिक वर्षको साउनदेखि असोजसम्मको अवधिमा डाइजोल्याव ३ हजार ७ सय, फेनारगन ३ हजार ४ सय, नोर्फिन ३ हजार ४ सय बरामद गरिएको वीरगंज भन्सारमा रहेको सशस्त्र प्रहरी बल १४ नम्बर गुल्मका राजश्व गस्ती टोलीका प्रमुख सशस्त्र प्रहरी नायव उपरीक्षक अमर खत्रीले जानकारी दिनुभयो ।
यस्तै यही अवधिमा ४२ बोतल वाइन सिरेक्स र २ प्याकेट ब्राउन सुगर पनि बरामद भएको खत्रीले जानकारी दिनुभयो । यस्तै सशस्त्र प्रहरीले भन्सारको मूलगेटबाटै लागुऔषधसहित एक जनालाई पक्राउ गरेको छ । भारतको मोतिहारी रामगढवाथानाका ३० वर्षीय विशाल पटेललाई रक्सौलबाट वीरगंज आउनेक्रममा लागुऔषधसहित प्रहरीले पक्राउ गरेको हो ।
पटेलको साथबाट ससस्त्र प्रहरीले ५/५ सय पिस डाइजोल्याव, नोर्फिन र फेनागरगन बरामद गरेको हो । पक्राउ परेका पटेललाई थप कारवाहीका लागि लागुऔषध नियन्त्रण व्युरो पर्सामा बुझाइएको सशस्त्र प्रहरी नायव उपरीक्षक अमर खत्रीले जानकारी दिनुभयो ।
