वीरगंज । वीरगंज महानगरपालिका कार्यालयको वारुण यन्त्र शाखामा कार्यरत अग्नि नियन्त्रक बुनीलाल चौरसीयालाई गोलीहानी हत्या भएको पुष्टि भए पछि हत्याराको कार्वाहीको मांग गर्दै प्रदर्शन भएको छ । मृतकका आफन्त सहित स्थानियहरुले शनिबार दिउसो वीरगंजको घण्टाघरमा शव राखि प्रदर्शन गरेका हुन ।
बिहीबार साँझ घरबाट निस्किएका उनको शव शुक्रबार विहान वीरगंज १६ नागवा स्थित माइधीया पोखरीको डिलमा फालिएको अवस्थामा फेला परेको थियो । मृतक चौरसियाको शवको नारायणी अस्पतालमा भएको पोस्टमार्टबाट मृतक चौरसीयाको टाउकोमा २ गोली, छातीमा २ गोली र नाईटोमा १ गोली गरी ५ गोली लागेको खुलेको छ ।
मृतकको पोष्टमार्टम रिपोर्टबाट गोली हानी हत्या भएको आफन्त र स्थानियहरुले थाह पाए पछि हत्या उपर कडा भन्दा कडा कार्वाहीको मांग गर्दै प्रदर्शन गरेका हुन् ।
चौरसीयाको हत्यामा संलग्न रहेको आशंकामा प्रहरीले एक दम्पतिलाई शुक्रबार राति नै नियन्त्रणमा लिएको छ । प्रहरीले वीरगन्ज ६ माइस्थानका दिपक किशोर अग्रवाल र उनकी श्रीमति निधी अग्रवाललाई पक्राउ गरेको हो ।
प्रहरी हिरासतमा रहेका अग्रवाल दम्पतिको घरमा शुक्रबार राति नै प्रहरीले खानतलासी गरेको छ । अग्नि नियन्त्रक चौरसियाको हत्याले वीरगंजको शान्ति सुरक्षामा प्रहरीको लागि चुनौतिको बिषय बनेको छ ।
