वीरगंज । किशोरी संवाद कार्यक्रम अन्तर्गत वीरगंजमा संचालित संवाद सहजिकरणको लागि दोस्रो मोडल ५ दिने एनिमेटर तालिम आज सम्पन्न भएको छ । युरोपियन युनियनको सहयोेगमा चाईलड नेपाल र संरक्षण नेपालको सहकार्यमा नेपाल ग्रामिण पुनर्निर्माण संस्था (आर.आर.एन.) ले आयोजनामा गरेको तालिम सम्पन्न भएको हो ।
होटल विजय ज्योति वीरगंजमा भएको तालिमको समापन समारोहमा वोल्दै जिल्ला समन्वय समिति पर्साका सह संयोजक ठाकुर प्रसाद न्यौपानेले नेपाल सरकारले लिएको समृद्ध नेपालको नारा पुरा गर्न किशोरीहरुको भुमिका महत्वपूर्ण रहेको वताए । उनले किशोरीहरुले तालिमबाट सिखेको कुरा समुदायमा लागु गरे समृद्ध नेपालको अभियानमा सहयोग पुग्ने धारणा राखे ।
समापन समारोहका प्रमुख अतिथी समेत रहेका सह संयोजक न्यौपानेले किशोरीहरुले संचालन गर्ने गतिविधिबाट समाजमा रहेको विकृति अन्तय भई समाज सुधार भए पछि समृद्ध नेपालको अभियानमा पनि सहयोग पुग्ने भएकोले अगाडी बढन सहभागिहरुलाई आग्रह गरे ।
कार्यक्रम व्यवस्थापक भानु पराजुलीको अध्यक्षतामा भएको समापन समारोहमा पर्साका सहभागिहरुको तर्फबाट एनिमेटर शान्ति बन्जारा र बाराबाट कञ्चन साहले वोल्दै तालिमबाट सिखेको कुरा व्यवहारमा लागु गर्न प्रतिवद्धता जनाए ।
तालिममा संस्थाका संवाद अधिकृत प्रशिक्षक भिम कुमार राई, प्रकाश पाण्डे, उमा राय माझी, पुर्जा बर्मा, सुनेश्वर साह, महिला अधिकारकर्मी निभा साह, स्वास्थ्यकर्मी अनिशकान्त कुशवाहाले प्रशिक्षण दिएका थिए । तालिमका सहभागिहरुलाई संवाद संचालन निर्देशिका भाग २ किताब पनि वितरण गरिएको थियो । तालिममा बारा, पर्साका २ दर्जन जति एनिमेटरहरुको सहभागिता रहेको थियो ।
तालिममा बालअधिकार, नेपालको संविधानमा बालअधिकार बारेको कानुनी प्रावधान, महिला अधिकार, अपाङ्गता भएका व्यक्तिहरुको सेवासुविधा र बिशेष अधिकार, बैदेशिक रोजगारको लागि युवाहरुको आप्राबासन, सुरक्षित अप्रवासन, जन्मदर्ता, नागरिकता, विवाहदर्ता, सम्बन्ध विच्छेद, मेलमिलाप, प्रजनन स्वास्थ्य लगायतका बिषयमा प्रशिक्षण दिइएको थियो ।
