वीरगन्ज । बाराको प्रसौनी गाउँपालिकाको प्रमुख प्रशासकिय अधिकृत रंजित कुमार यादव एक महिनादेखि वेपता भएका छन् । लामो समय देखी लगातार प्रमुख प्रशासकिय अधिकृत यादव कार्यालयमा अनुपस्थित हुँदा गाउँपालिकाको कामकाज प्रभावित हुदै आएको छ ।
कसैलाई कुनै जानकारी नै नगराई एक महिना देखी प्रमुख प्रशासकिय अधिकृत यादव कार्यालयमा अनुपस्थित भएको गाउँपालिका अध्यक्ष भोला प्रसाद गुप्ताले स्वीकार गरे । कार्यालयको निमित्त जिम्मेवारी पनि कसैलाई नदिई अधिकृत यादव वेपता भएको अध्यक्ष गुप्ताले जानकारी गराए ।
कार्यालय प्रमुख यादव नहुँदा दिनँहु सयौ सेवाग्राही काम नै नगराई फर्कने गरेका छन् । समाजिक सुरक्षा भत्ता वितरण समेत प्रभावित भएको छ ।
गाउँपालिकाबाट हुने विभिन्न सिफारिस, नयाँ योजनाको बारे निति तथा कार्यक्रम सञ्चालन हुन सकेको छैन । त्यसैगरी आर्थिक कारोबार, विरामीहरुको उपचार्थमा सहयोगलगायतको अति आवश्यक कामकाज समेत प्रभावित भएको छ ।
लामो समय सम्म विना जानकारी अधिकृत यादव कार्यालयमा अनुपस्थित भएपछि गाउँपालिकाले प्रशासनिक कामकाज सुचारुको लागि निमित्तको जिम्मेवारी गाउँपालिकाकै अधिकृत सुरेश साह कानुलाई तोकेको छ ।
बाराका प्रमुख जिल्ला अधिकारी राजेश पौडेलको समन्वय प्रशासनिक कामकर्वाही संचालनको मात्र जिम्मेवारी तोकिएको अध्यक्ष गुप्ताले वताए ।
गाउँपालिका अध्यक्ष गुप्ताले प्रमुख प्रशासकिय अधिकृतको अनुपस्थितको हाजिरी प्रमाणित गरी संघीय मामिला तथा समान्य प्रशासन मन्त्रालयमा मंगलबार पठाइएको समेत जानकारी गराए । मन्त्रालयले पनि प्रमुख प्रशासकिय अधिकृत यादवलाई न त कहि सरुवा नै गरेको छ न त अरुलाई प्रसौनी गाउँपालिकामा पठाएको उनले वताए ।
केही दिन पहिला प्रसौनी गाउँपालिकामा घुस लिएको आरोपमा एकजना पक्राउ समेत परेका थिए । पक्राउ परेको दिन देखिनै गाउँपालिकाको कामकाज थप प्रभावित हुँदै आएको छ । गाउँपालिका स्रोतका अनुसार गाउँपालिकामा गत आर्थिक वर्ष २०७५र०७६ मा भएको विकास निर्माणको कामका अनुमानित ३ करोड रुपैयाँ निकासा गर्न बाँकी समेत रहेको छ ।
भुक्तानीको रकम निकासा गर्नको लागि गाउँपालिकाकाले चेक तयार गरेपनि प्रमुख यादवको हस्ताक्षर विना निकासा हुन सकेको छैन । लामो समय देखी प्रमुख प्रशासकिय अधिकृत सम्पर्क विहिन भएका कारण गाउँपालिकामा भएको विभिन्न विकास निर्माण कामको भुक्तानी हुन नसकेको हो ।
