वीरगन्ज, ९ जेठ ।
पर्सामा फेरी हावाहुरीको कहरले एक किशोरीको ज्यान गएको छ । बुधबार बेलुका आएको हावाहुरीले पर्साको पकहा मैनपुर गाँउपालिका १ धोरेका दिनेश सहनीकी छोरी १३ वर्षीय श्रुती कुमारी सहनीको ज्यान गएको हो । गाउँ कै हाट बजारबाट तरकारी किनेर घर फर्किँदा बुधबार सांझ एकासी आएको हावाहुरीले सडक छेउको सिमलको रुख भाँचिएर श्रुती च्यापिएकी थिइन् ।
रुखले च्यापिएर गम्भीर घाइते भएकी श्रुतीको उपचारको क्रममा बुधबार राती नै मृत्यु भयो । श्रुतिलाई उपचारका लागि सुरुमा वीरगन्ज हेल्थ केयर हस्पिटलमा लगिएको थियो । त्यहाँ उनको उपचार हुन नसकेपछि उनलाई नेशनल मेडिकल कलेजमा रिफर गरिएको र त्यहीँ उपचारको क्रममा बुधबार राति ढेड बजे उनको मृत्यु भएको प्रहरीले जनाएको छ ।
श्रुती गाउँ कै श्री ने.रा. अधारभुत विद्यालयको कक्षा ८ मा अध्ययनरत थिइन । उनको मृत्युको शोकमा विद्यालयले बिहिबार एक दिन विदा पनि दिएको छ ।
उनी संगै रहेकी उनकी दिदी २१ बर्षिय संझना सहनी (रानी) बाच्न सफल भएकी छन । रुखको हांगाले लडेर समझना समान्य घाइते भएकी हुन । समझनाको हातमा समान्य चोटपटक मात्र लागेको पकहा मैनपुर १ धोरेका वडा सचिव हरिमोहन महतोले वताए ।
