वीरगञ्ज, २७ बैशाख ।
पर्साको सखुवा प्रसौनी गाउँपालिकाले गर्भवती महिलाहरुलाई कुखुराको चल्ला वितरण गरेको छ । गाउँपालिकाको स्वास्थ्य शाखाले बहुक्षेत्रीय पोष्ण कार्यक्रम अन्तर्गत बिहिबार एक कार्यक्रमका विच वडा नं. १, २ र ५ को गर्भवती महिलाहरुलाई कुखुराको चल्ला वितरण गरेको हो ।
गर्भवती महिलाहरुलाई अण्डा खानको लागि तिन वटै वडाका ३ सय जनालाई कुखुराको चल्ला वितरण गरिएको गाउँपालिकाका स्वास्थ्य संयोजक राजेश प्रसाद रौनियारले वताए । स्वास्थ्य चौकी सखुवा प्रसौनीमा भएको कार्यक्रममा गाउँपालिका अध्यक्ष प्रदिप कुमार जयसवालले गर्भवती महिलाहरुलाई कुखुराको चल्ला वितरण गरे ।
कुखुराको चल्ला वितरण गर्दै अध्यक्ष जयसवालले गर्भाअवस्थामा महिलाहरुलाई खानपिनमा विशेष ध्यानदिनु पर्ने वताए । त्यस कै लागि बहुक्षेत्रिय पोष्ण कार्यक्रम अन्तर्गत सुनौ हजार दिनको आमाहरुलाई ८ हप्ते कुखराको चल्ला वितरण गरिएको उनले वताए ।
यता सखुवा प्रसौनी गाउँपालिकाको वडा नं. ३ मा पोष्ण सम्बन्धि तालिम सम्पन्न भएको छ । वडा अन्तर्गतका ६० जना किशोरीहरुको सहभागिता रहको तालिम सम्पन्न भएको हो । तालिममा स्वास्थ्य संयोजक रौनियार, दिपनारायण महतोले किशोरीहरुलाई संतुलित खाना, आइरन चक्कीको प्रयोग तथा महिनावारी स्वास्थ्य व्यस्थापन बारेमा प्रशिक्षण दिएका थिए ।
