वीरगञ्ज, २६ बैशाख ।
सीमावर्ती भारतीय राज्य बिहारमा हुने तेस्रो चरणको लोकसभा निर्वाचनका लागि तीन दिन सीमा आवागमन बन्द हुने भएको छ । निर्वाचनका लागि वैशाख २७ गतेदेखि २९ गतेसम्म अर्थात मे १० देखि १२ तारिकसम्म्म ३ दिन नेपाल भारतको सीमा नाका बन्द हुने पर्साका प्रमुख जिल्ला अधिकारी नारायणप्रसाद भट्टराईले जानकारी दिए ।
तीन दिनसम्म नेपालको बारा, पर्सा, रौतहट र नवलपरासी जिल्लाहरुमा उक्त दिनहरुमा ४८ घण्टाको लागि सिमा आवागमन बन्द हुने उनले जानकारी गराए ।
भारतको महावाणिज्य दूत वीरगंजको नोट भर्वल अनुसार अनुरोध भई आएकोले उक्त अवधिका लागि नेपाल भारत सीमामा आवागमन बन्द हुने जिल्ला प्रशासन कार्यालय, पर्साले सुचना प्रकाश गर्दै समेत जानकारी गराएको छ ।
पर्सा जिल्लाको मात्रै १ सय ७ किलोमिटर भू–भाग भारतको बिहारसँग जोडिएको छ । बिहारलगायत ७ राज्यको ५९ लोकसभा सीटमा १२ मे अर्थात वैशाख २८ गते निर्वाचन हुँदैछ ।
भारतीय लोकसभा निर्वाचनलाई लिएर पछिल्लो पटक सीमावर्ती सुरक्षा निकायका अधिकारीहरुको समन्वय बैठक डेढ महिना अघि मोतिहारीमा बसेको थियो ।
