वीरगंज,५ बैशाख ।
१७ चैतमा आएको विनाशकारी टोर्नाडोले घर उडाएपछि हावाहुरी पिडित रहत स्वरुप पाएका चाईनिज टेन्टका घर समेत उडाएको छ । मंगलबार साँझ आएको हावाहरीले घर जस्तै देखिने ‘चाईनिज टेन्ट’ मात्र उडाएन, घरमा भएको राहतको लताकपडा तथा राहतका चामल पनि घोप्ट्यायो ।
हावाहुरीले अति प्रभावित भलुही भरवलीया र पुरैनिया गाउँका एक दर्जन टेन्ट उडाइदिएको छ । १७ चैतको आँधीपछि प्रभावित क्षेत्रमा नेपाली सेना, सशस्त्र प्रहरी र नेपाल प्रहरीले अस्थायी आवासका लागि टेन्ट गाडिदिएका थिए ।
असिना पानीसँगै आएको हावाहुरीले टेन्ट उडाएपछि उनीहरुले छिमेकीको घरमा रात सोवएबले विताए ।
फेटा गाउँपालिका(१ का गेना राउत मंगलबारको हावाहुरीले पछिलो घटनालाई ताजा गरिदिएको बताउँछन् । ‘अस्तीको जस्तो त होइन तर, हावाहुरी र पानी आइरहेको थियो, घर छेउको बिजुलीको पोल हल्लिरहेको थियो’ उनले भने ‘ फेरि घर ढल्ने हो कि भन्ने डर मनमा थियो । त्यसैले सबैजना भागेर खुल्ला ठाउँमा गएर बस्यौं ।’
हासिमसँगै सफिक अन्सारी, मुस्तुफा अन्सारी, रफिक अन्सारी, तुफैल अन्सारी र सबिला खतुनको अस्थायी टेन्ट बस्न नमिल्ने हावाले उडाएको छ ।
प्रदेश सरकारले टोर्नाडो प्रभावितहरु घर बनाउने भएको छ, त्यसमा सहकार्य गर्ने गरी संघीय सरकारले पनि घर निर्माणको जिम्मा नेपाली सेनालाई दिने निर्णय गरेको छ । प्रधानसेनापति पूर्णचन्द्र थापाले स्थलगत निरीक्षण समेत गरिसकेका छन् ।
फेटा गाउँपालिकाका नायबसुब्बा सुशील यादव भन्छन्, ‘सेनाको सहयोग लिएर प्रभावितका लागि घर बनाउने भनिएको छ । त्यसैले स्थानीय सरकारले घरबारे केही सोचेको छैन ।’
तर, हुरी प्रभावितको एउटै आग्रह छ, छिटो भन्दा छिटो घर बनोस् र त्यसमा ढुक्कसँग बस्न पाइयोस् ।
