वीरगंज, १९ चैत ।
भिषण हावाहुरीले घाइते भई उपचार गराइरहेका एक बालकको आज मृत्यु भएको छ । गत आइतबार साँझ आएको हाहुरीले योसँगै आँधीहुरीले ज्यान गुमाउनेको संख्या २८ पुगेको छ । यसअघि बारामा २६ र पर्सामा एक जना गरी २७ जनाको मृत्यु भएको थियो ।
वीरगन्जको नेशनल मेडिकल कलेजमा उपचार गराइरहेका बाराको फेटा गाँउपालिका ६ का फिरोज अंसारीका पाँच वर्षीय छोरा फैयाज आलमको मंगलबार मृत्यु भएको हो ।
नेशनल मेडिकल कलेजको आइसियुकक्षमा गत आइतबार रातिदेखि उपचार गराइरहेका आलमको मंगलबार दिउँसो मृत्यु भएको पर्साका प्रहरी नायव उपरीक्षक अनन्तराम शर्माले वताए ।
विनाशकारी हावाहुरीले घाइते भएका ४ सय भन्दा बढीको वीरगन्जका विभिन्न अस्पतालमा र कलैय अस्पतालमा उपचार भइरहेको छ । पाँचजना घाइतेलाई उपचारका लागि काठमाडौँ लगिएको छ । विनाशकारी हावाहुरीले बारा र पर्साको १५ सय भन्दा बढी घरमा क्षति पुगेको छ ।
