बारा, १९ चैत ।
हावाहुरी प्रभावित क्षेत्र बाराको फेटा गाउँपालिकामा नेपाली सेनाले पीडितका लागि अस्थायी टहरा निर्माण सुरु गरेको छ। फेटा गाउँपालिका १, ३ र ६ मा भत्किएका संरचना हटाएर सेनाले टहरा निर्माणको काम सुरु गरेको हो।
आँधीका कारण घरविहीन बनेका पीडितका लागि अस्थायी बसोबास गर्न टहरा निर्माण सुरु गरिएको नेपाली सेनाका मेजर चिरञ्जीवी बोहोराले जानकारी दिए। ‘अहिले भत्किएका संरचना हटाएर टहरा निर्माण गर्न सुरु गरिरहेका छौं। पीडितलाई ओत लाग्ने ठाउँसम्म छैन’, उनले भने, ‘हामीले बिहानैदेखि जग्गा छनोट गरेर सम्याउने काम गरिरहेका छौं। केन्द्र सरकारले पठाएको त्रिपाल आउने बितिकै टाँगेर तयार गर्छौं।’
गृह मन्त्रालयको विपद् व्यवस्थापन महाशाखाका अनुसार सशस्त्र प्रहरीको ट्रकमार्फत ४६८ वटा त्रिपाल बारा र पर्सातर्फ पठाएको छ। बाराको फेटा गाउँपालिकामा मात्रै चार यस बढी घर प्रभावित बनेका छन्।
आइबतार साँझको हुरीले घर भत्काउँदा चार सय बढी घाइते भए। घाइतेहरूको विभिन्न अस्पतालमा उपचार भइरहेको छ। रातभर ओत लाग्न नपाउँदा बालबालिकाहरू बढी प्रभावित भए। प्रभावित क्षेत्रको अवस्था निकै कष्ठकर छ।
