वीरगंज, १८ चैत ।
प्रधानमन्त्री केपी शर्मा ओली हवाहुरी प्रभावित क्षेत्रको निरिक्षण गरेका छन । झापाबाट बारा आइपुगेका प्रधानमन्त्री ओलीले सोमबार दिउँसो हावाहुरीबाट सबैभन्दा बढी प्रभावित फेटा गाउँपालिकोको हेलिकोप्टरबाट निरीक्षण गरेका छन । त्यस पछि वीरगंजको नारायणी अस्पताल र बाराको कलैया अस्पतालमा पुगी प्रधानमन्त्री केपी शर्मा ओलीले हावाहुरीबाट प्रभावित बारा र पर्साका घाइतेलाई भेट गरेका हुन् ।
सोमबार हेलिकोप्टरबाट बारा र पर्सा पुगेका उनले त्यहाँका अस्पतालमा उपचाररत घाइतेसँग भेट गरेका हुन् । बाराको कलैया अस्पतालमा उपचाररत घाइतेलाई भेटेर प्रधानमन्त्री ओली वीरगञ्जस्थित नारायणी अस्पताल र नेशनल मेडिकल कलेजमा उपचाररत विरामीलाई भेट गरेका हुन् ।
त्यहाँबाट उनी काठमाडौं फर्किने कार्यक्रम छ । प्रधानमन्त्री ओलीसँगै उपप्रधानमन्त्री उपेन्द्र यादव, गृहमन्त्री रामबहादुर थापा बादल, भौतिक पूर्वाधार मन्त्री रघुवीर महासेठ, शहरी विकास मन्त्री मोहम्मद इस्तियाक राई पनि वीरगञ्ज पुगेका थिए ।
प्रधानमन्त्री चढेको हेलिकोप्टर हवाइ निरीक्षणपछि कलैयास्थित सेनाको क्याम्पमा अवतरण भयो । त्यहाँ प्रधानमन्त्रीले हावाहुरीबाट भएको क्षति, उद्धार तथा राहतमा भइरहेको प्रयासबारे ‘ब्रिफिङ’ लिएका छन् ।
प्रधानमन्त्री र गृहमन्त्रीसहितको टोलीलाई बाराका प्रमुख जिल्ला अधिकारी राजेश पौडेलले घटनाको अवस्थाबारे जानकारी गराएका छन् । यसक्रममा आइतबार राति पौने ८ बजेदेखि सवा ८ बजेसम्म गएको हावाहुरीले अहिलेसम्म २७ जनाको निधन भएको प्रमुख जिल्ला अधिकारीले प्रधानमन्त्रीलाई जानकारी गराएका छन् ।
हावाहुरीले कलैया उपमहानगरपालिकासहित महागढीमाई नगरपालिका, पचरौता नगरपालिका, प्रसौनी गाउँपालिका, फेटा गाउँपालिका, सुवर्ण गाउँपालिका, परवानीपुर गाउँपालिकामा धनजनको क्षति भएको स्थानीय प्रशासनले जनाएको छ । नाराणी अस्पताल पुगेका प्रधानमन्त्री संगै प्रदेश नं. २ का मुख्य मन्त्री लालबाबु राउत गद्दी पनि थिए ।