वीरगञ्ज, २ चैत ।
वीरगञ्मा दोस्रो प्रिमियर लिग क्रिकेट प्रतियोगिता हुने भएको छ । टिम आदर्शनगर, वीरगञ्जको आयोजनामा बैशाख ७ गते देखि प्रतियोगिता हुने आयोजकले जनाएको छ । आयोजक टिम आदर्शनगरले आज नेपाल पत्रकार महासंघ पर्साको भवनमा पत्रकार सम्मेलन गर्दै प्रतियोगिता बारे जानकारी गराएको हो ।
आदर्शनगर रंगशालामा हुने प्रतियोगितामा १० वटा टिमको सहभागिता रहने टिमका संयोजक सदाम हुसेनले वताए । प्रतियोगिताको लागि खेलाडी र टिम दर्ताको कार्य सुरु भइसकेको उनले वताए । उनका अनुसार खेलाडी दर्ता शुल्क रु १५ सय र टिम दर्ता शुल्क रु ७० हजार रहेको छ । चैत्र ६ गते सम्म प्रतियोगितामा सहभागि हुन खेलाडी र टिम दर्ता गराउन सकिने छ ।
रु १७ लाख ५० हजारको लागतमा हुन गइरहेको प्रतियोगिताको विजेतालाई रु एक लाख र उप विजेतालाई रु ५० हजार प्रदान गरिने आयोजक टिमका अध्यक्ष सुमित कादमियाले वताए । पत्रकार सम्मेलनमा वोल्दै उनले १५ ओभरको हुने प्रतियोगिता डे नाईट हुने वताए । वीरगञ्ज प्रिमियर लिग प्रतियोगिताले वीरगञ्जका क्रिकेट खेलाडीहरुलाई अझ सशक्त बनाउने अध्यक्ष कादमियाको भनाई थियो ।
पत्रकार सम्मेलनमा टिमका उपाध्यक्ष विवेक कुमार सरार्फ, सह सचिव इशमाईल अली, क्रिकेट खेलाडी इर्शाद एहमद लगायतकाको सहभागिता रहेको थियो ।
