एजेन्सी, मुम्बई । चलचित्र ‘भारत’ मा बलिउड अभिनेता सलमान खानसँगै काम गर्दा आफू निकै उत्साहित भएको अभिनेत्री कट्रिना कैफ बताएकी छन् । सम्पूर्ण छायांकन सकिएको यो चलचित्रमा सलमानको जोडीको रुपमा अभिनेत्री कट्रिना देखिएकी छन् । उनले नै इन्स्टाग्राममा सलमानसँगको एक तस्बिर सार्वजनिक गर्दै भारतको छायांकन सकिएको जनाएकी हुन् ।
अभिनेत्री कट्रिनाले इन्स्टाग्राममा चलचित्रलाई लिएर आफू निकै उत्साहित भएको जनाएकी छन् । उनले लेखेकी छन्, ‘यो चलचित्र मेरो लागि पूर्ण नयाँ र उत्साहित चलचित्र बनेको छ । चलचित्रको निर्माणको सम्पूर्ण कुरा मेरो लागि प्रेरणादायी भएको छ ।’ उनले अली अब्बास जफर र सलमान खानलाई धन्यवाद दिएकी छन् ।
सलमानको मुख्य भूमिका रहेको ‘भारत’ यो वर्षको बहुप्रतिक्षित चलचित्र मध्येको एक हो । अली अब्बासले निर्देशन गरेको यो चलचित्र हिन्दी भाषामा मात्र नभएर अन्य तीन भाषामा डबिङ गरी रिलिज गर्ने तयारी भइरहेको निर्माण पक्षले जनाएको छ । इदको अवसर पारेर रिलिज गरिने यो चलचित्रलाई मलयालम, तामिल र तेलुगु भाषामा पनि डबिङ गरिने निर्माण पक्षले जानकारी दिएको छ ।
