सोनाम ल्होछारमा प्रदेश २ मा विदा दिने मुख्य मन्त्रीको घोषणा
मेघराज राय/जिराभवानी, माघ १९\
२८५५ औ सोनाम ल्होछारको अवसरमा प्रदेश न २ मा सार्वजनिक विदा हुने भएको छ।यस बर्षदेखि संघीय सरकारले सोनाम ल्होछारको विदा कटौती गर्दै समबन्धित तामाङ जातीलाई मात्र बिदा दिने निर्णय गरेको थियो । प्रदेश २ का मुख्य मन्त्री लालबाबु राउतले संघीय सरकारले कटौती गरेको ल्होछारको बिदालाई प्रदेश २ मा दिने घोषणा गरेका छन् ।
उनले पर्साको ठोरी गाउँपालिका को ५ ठूलो बाघमोर्चामा सोनाम ल्होछारको अवसरमा आयोजित बृहत सास्कृतिक कार्यक्रमको उद्घाटन गर्दै सार्वजनिक विदाको घोषणा गरेका हुन् ।सो अवसरमा मुख्य मन्त्री राउतले नेपाल बहुजातीय,बहुधार्मिक र बहु सास्कृतिक मुलुक भएकाले प्रदेश २ ले सवैलाई सम्मान गर्ने उद्घोष गरे।उनले आफू ल्होछारको कार्यक्रममा उपस्थित हुन पाउँदा आफ्नो प्रदेशमा रहेका करीब १ लाख १५ हजार तामाङको सम्मान गरेको अनुभुती भएको जिकिर गरे ।
कार्यक्रमका प्रमुख अतिथी समेत रहेका उनले ठोरीको विकासमा सक्दो सहयोग गर्ने प्रतिबद्धता समेत व्यक्त गरे।अर्को फरक प्रसङ्गमा मुख्यमन्त्री राउतले प्रदेश २ मा यहि माघदेखि जन्मिने हरेक बालिकाहरुको रु १ लाखको बिमा गरिने समेत बताए ।
सोही कार्यक्रममा मन्तव्य व्यक्त गर्दै जिल्ला समन्वय समिति पर्साका उपसभापति ठाकुर न्यौपानेले जिल्ला समन्वय समिती कार्यकारी निकाय नभएकाले आफुले संघ र प्रदेशसंग समन्वय मात्र गर्न सक्ने बताए।त्यसैगरी कार्यक्रमलाई सम्बोधन गर्दै ठोरी गाउँपालिकाका अध्यक्ष पदमलाल श्रेष्ठले ठोरीमा पर्यटन प्रवर्द्धनको धेरै नै सम्भावना भएकाले आफ्नो कार्यकालमा नयाँ ठोरी बन्ने विश्वास व्यक्त गरे।उनले त्यसका लागी प्रदेश २ सरकारलाई पनि सहयोग गर्न समेत आग्रह गरे ।
अध्यक्ष श्रेष्ठले मुख्यमन्त्रीको पनि गृह जिल्ला भएकाले आफुले अवश्य पनि प्रदेशको साथ पाउने विश्वास व्यक्त गरे।कार्यक्रममा ठोरीका उपाध्यक्ष शान्तिमाया थिङ,साविक सुवर्णपुर गाविसका अध्यक्ष जरी लामा,साबिक निर्मलवस्तिका अध्यक्ष लाल बहादुर श्रेष्ठ जगरनाथपुर गाउँपालिकाका अध्यक्ष जालिम मिया,वडाध्यक्षहरु किशोर तामाङ,बई बहादुर पाख्रीन लगायतले शुभकामना सन्देश व्यक्त गरेका थिए ।
सो कार्यक्रमको सभापतित्व तेउरे पाख्रीनको अध्यक्षता सम्पन्न भएको थियो । मुख्यमन्त्रीलाई ठूलो बाघमोर्चामा रहेका विभिन्न समस्या समाधानमा पहल गरिदिन अनुरोध गर्दै ज्ञापनपत्र समेत बुझाइएको आयोजक समितिका अष्ट बहादुर लोप्चनले जानकारी दिए ।
त्यसैगरी सोही कार्यक्रममा कामदा मिलन पत्रकारिता पुरस्कारबाट सम्मानित भएका पत्रकार प्रेम लामालाई पनि सम्मान गरिएको थियो।ठूलो बाघमोर्चाको खेल मैदानमा आयोजित कार्यक्रममा चर्चित गायक/गायिकाहरु प्रेम लोप्चन, इन्दिरा गोले, मेलिना राई लगायतले आफ्नो प्रस्तुति गरेका थिए ।
