राजन बानिया/पोखरिया, २४ पुस ।
पर्साको छिपहरमाई गाउँपालिकाको वडा नं ३ जयमंगलापुरमा मंगलबार साना किसानहरुलाई मल , बीउ र कुदालो बितरण गरिएको छ । वडाध्यक्ष बिनोद साह कानुको अध्यक्षतामा र गाउँपालिका अध्यक्ष मनोज कुमार गुप्ताको प्रमुख आतिथ्यतामा भएको कार्यक्रममा साना किसानहरुलाई कृषि सामग्री बितरण गरिएको हो ।
गाउँपालिका अन्तर्गतका वडा नं. ३ का साना किसानहरुलाई पहिचान गरि मल, खाद, बीउ र कुदालो बितरण गर्दै कार्यक्रमका प्रमुख अतिथि गाउँपालिका अध्यक्ष गुप्ताले गाउँपालिकाबाट बीउ,बिजन, मलखाद, कृषि उपकरण लगायतका कृषि सामग्रीहरु बितरण गर्दा पहिला साना किसानहरुलाई विशेष प्रथमिकता दिएको कार्यक्रममा वताए । आगामी दिनमा कृषकहरूका लागी कृषि समबन्धि विशेष कार्यक्रम ल्याउने पनि कार्यक्रम मार्फत उनले उद्घोष गरे ।
गाउँपालिकाको पाँचै वटै वडाहरूमा साना किसानहरुलाई छनौट गरिएको छ । जस अन्तरगत एक बिगाहा भन्दा कम जग्गा भएको किसानहरुलाई साना किसानको रुपमा वर्गीकरण गरेर परिचय पत्र बितरण गरिएको गापा कार्यालयले जनाएको छ । साना किसान परिचय पत्र सम्भौता, मिर्जापुर, जयमंगलापुर, तुलसिबर्वा र भिस्वाका सानाकिसानहरुलाई बितरण गरिने अध्यक्ष गुप्ताले बताए ।
कृषिका लागि आवश्यक मलखाद, बिउबिजन, कृषि उपकरण आदिमा नेपाल सरकारले अनुदान दिने गरेको छ । साना किसान परिचय पत्र प्राप्त गर्ने किसानले यस्ता कृषि सामग्री प्राप्त गर्दा पहिलो प्राथमिकता पाउने कार्यक्रममा जानकारी गराइएको थियो । छिपहरमाई गाउँपालिका वार्ड नं ३ जयमंगलापुरमा मलखाद,बिउबिजन र कुदालो बितरण कार्यक्रममा प्रमुख प्रसाशकिय अधिकृत पाक्रम खां, गाउँपालिका कृषि प्रमुख मसिलाल साह, ज्ञानबहादुर साह लगायतको सहभागिता रहेको थियो ।
