पर्सा, १३ पुस १३ ।
पर्साको ठोरी गाउँपालिकामा आजदेखि ऐतिहासिक प्रथम ठोरी महोत्सव सुरु भएको छ । वडा न २ को राइधारामा आयोजित महोत्सवको एक भव्य समारोहका बीच कृषि तथा पशुपन्छी राज्य मन्त्री राम कुमारी चौधरीले उदघाटन गरेकी छिन् ।
उद्घाटन समारोहलाई सम्बोधन गर्दै कार्यक्रमको मुख्य अतिथि समेत रहेकी मन्त्री चौधरीले ठोरीमा प्रचुर विकासको सम्भावना रहेको बताइन । ठोरी महोत्सवले समग्र २ नंं. प्रदेशकै ध्यान खिच्न सफल भएको बताउँदै मन्त्री चौधरीले अब ठोरीको विकासमा सबै एकजुट हुनुपर्ने धारणा व्यक्त गरिन । उनले संघीयता सुरुवाती चरणमा भएको बताउँदै कार्यान्वयन हुने क्रममा सवैको पहिचानको माग सम्बोधन हुने जिकिर गरिन ।
कार्यक्रममा पर्सा निर्वाचन क्षेत्र न ४ का पुर्व सांंसद जय प्रकाश थारुले मुलुकलाई अप्ठ्यारो पर्दा ठोरीले सधैं सघाउने भए पनि ठोरीको समुचित विकासमा कसैले पनि ध्यन नदिएको आरोप लगाए । पर्यटकिय गन्तव्यको सम्भावना भएर पनि त्यसलाई व्यवस्थित गर्न नसकिएको बताउँदै उनले अवको ध्यान ठोरीलाई नाकाको रुपमा विकास गर्न हुनुपर्ने बताए ।
नेकपाका प्रदेश नं. २ का सदस्य प्रभु हजराले ठोरीको विकास जरुरी रहेको बताए । उनले हुलाकी सडक, सिमा सुरक्षा कार्यक्रम लगायतका विकास निर्माण कार्य ठोरीमा प्रारम्भ भैसकेको बताउँदै कुनै हालतमा पनि ठोरी प्रदेश २ बाट छुट्टिन नहुने बताए ।
हजराले ठोरी प्रदेश २ बाट छुट्टिन नसक्ने बताउने बित्तिकै कार्यक्रम स्थलमा केही बेर नाराबाजी समेत भएको थियो ।हजराले माफी माग्नुपर्ने भन्दै उनका विरुद्ध ठोरीलाई प्रदेश ३ मा समायोजन गर्नुपर्छ भन्ने पक्षधरका केही व्यक्तिहरुले कार्यक्रम स्थल अगाडि केहिबेर नारबाजी गरेका थिए । प्रदर्शनकारीहरुलाई गापा अध्यक्ष पि.एल.श्रेष्ठ र प्रहरीले समन्वय गर्दै शान्त पारेका थिए ।
कार्यक्रममा स्वागत मन्तव्य राख्दै ठोरी गापाका अध्यक्ष पदमलाल श्रेष्ठले गाउँपालिकामा रहेको नदि नियन्त्रण, सिचाइ ,खानेपानी लगायतका विविध समस्याका बारेमा कार्यक्रम अवगत गराए । साथै उनले ठोरीका समस्या समाधान गर्नका लागि पहल गरिदिन कार्यक्रममा उपस्थित सम्पुर्ण अतिथिहरुलाई आग्रह समेत गरे ।
कार्यक्रममा प्रदेश सभा सदस्यहरु सुन्दर बिक, जिल्ला समन्वय समिति पर्साका उपसभापति ठाकुर प्रसाद न्यौपाने, नेकपाका बारा जिल्ला कार्यदल सदस्य क्षेत्र बहादुर श्रेष्ठ लगायतले मन्तव्य व्यक्त गरेका थिए ।
आयोजनक कपुरबोट मिडिया प्रालिका अध्यक्ष सन्तोष देउजाको सभापतित्वमा भएको कार्यक्रममा पर्साका जगरनाथपुर, पटेर्वा सुगौली, छिपहरमाई, सखुवा प्रसौनी गापाका अध्यक्षहरु, ठोरी गापाका जनप्रतिनिधिहरु, प्रहरी, सरकारी कर्मचारी, पत्रकार , ठोरीका ४ वटा माविका बिद्यार्थी र शिक्षकहरु, स्थानीय संघ संस्थाका प्रतिनिधिहरु लगायत सर्वसाधारणहरुको ठूलो संख्यामा उपस्थिति रहेकाे थियो ।
कार्यक्रममा ठोरीमा रहेका दीपकनगर मावि, सरस्वती मावि ,ओडार मावि र बिजयवस्ती माविका बिद्यार्थीहरुले मार्चपास समेत गरेका थिए । शुक्रबार देखि सुरु भएको महोत्सव पौष २३ सम्म चल्ने छ । महोत्सवमा लत्ताकपडा, होटेल ,दैनिक उपभोग्य सामग्रीहरु लगायतका स्टलहरु रहेका छन् । महोत्सवमा दैनिक रुपमा विभिन्न राष्ट्रिय स्तरका कलाकारहरुको प्रस्तुति समेत रहने आयोजकले जानााएको छ।
