जनकपुरधाम, ९ पुष ।
प्रदेश नं. २ का मुख्यमन्त्री लालबाबु राउतले मुश्लिम अगुवाहरुलाई बालबालिकाको शिक्षामा जोड दिन आग्रह गर्नु भएको छ । अलहुदा एजुकेशन एण्ड वेलफेयर सोसाइटीले आयोजन गरेको तीन दिवसीय प्रशिक्षण कार्यक्रमको समापन समारोहमा मुख्यमन्त्री राउतले मुस्लिम समुदायको समाजिक, राजनीति र आर्थिक उन्नयनका लागि बालबालिको शिक्षामा जोड दिनु पर्ने बताउनु भयो ।
उहाँले प्रदेश सरकार सबै जात समुदायको अधिकारको रक्षाको लागि प्रतिबद्ध रहेको उल्लेख गर्नु हुँदै राज्यले प्रदान गर्ने अधिकार प्राप्त गर्न समेत शिक्षा आवश्यक रहेको तर्फ अगुवाहरुलाई सचेत गराउनु भयो । प्रदेश सरकारले ल्याउन लागेको मदरसा बोर्डले इस्लामिक शिक्षाको साथै आधुनिक शिक्षाको पनि ज्ञारेन्टी गरेको हुँदा विधेयक पारित भए पछि मदरसामा अध्ययन गर्ने छात्र छात्राहरु समेत राज्यको मुलधारमा समाहित हुने उल्लेख गर्नु भयो ।
अब्दुला जोलमको अध्यक्षतामा भएको समापन समारोहमा पूर्व गृहराज्यमन्त्री रिजवान अन्सारी लगायतका वक्ताहरुले सम्बोधन गरेका थिए । योग्य शिक्षक उत्पादन गर्ने उद्देश्यले आयोजन गरिएको तालिममा मुलुकको विभिन्न मदरसामा अध्ययनरत ६० जना विद्यार्थीहरुको सहभागिता रहेको थियो ।
