वीरगञ्ज, १६ कात्तिक । नेपाल पत्रकार महासंघका अध्यक्ष गोविन्द आचार्यले पत्रकारलाई कानून बनाएर ठीक पार्नुपर्छ भन्ने सोचलाई पराजित गर्न सफल भएको बताएका छन् ।
‘कतिपयले पत्रकारलाई कानून बनाएर ठीक पार्ने सोचे,’ उनले भने, ‘जे मन लाग्यो त्यही लेख्यो, पत्रकारिता गर्नु भनेको अपराध हो भन्ने जस्तै सोच कतिपय मानिसमा देखिएको छ ।’
उनले कतिपयले पत्रकारलाई अपराधी देखेको भन्दै पत्रकारलाई हेर्ने दृष्टिकोण बदल्नु पर्ने बताए ।
प्रेस काउन्सिलको सहयोगमा नेपाल पत्रकार महासंघ पर्सा शाखाले आयोजना गरेको आचार संहिता जागरण कार्यक्रममा बोल्दै उनले सरकारले मुलुकी संहितामा भएको प्रावधान सच्याउने प्रतिवद्धता जनाएको बताए ।
पत्रकारबाट पनि गल्ती हुन सक्ने बताउँदै उनले गल्तीलाई सच्याउन र क्षमा माग्न कञ्जुस्याई गर्न नहुने बताए ।
प्रेस काउन्सिलका सदस्य गोविन्द चौलागाईले मधेसका पत्रिका विभेदमा नपरुन भन्नेमा काउन्सिल सचेत रहेको बताए ।
सामाजिक सञ्जालका कारण चुनौती थपिएको बताउँदै उनले जिम्मेवार र जवाफदेही पत्रकारिता गर्न सुझाव दिए ।
नेपाल पत्रकार महासंघ पर्सा शाखा अध्यक्ष श्याम वञ्जाराको अध्यक्षतामा भएको कार्यक्रममा प्रदेश नं २ का अध्यक्ष दिपेन्द्र चौहान , पर्साका सचिव युवराज खडका लगायतले मन्तव्य व्यक्त गरेका थिए ।
