वीरगंज, ८ कात्तिक ।
श्री सुकई साह माध्यमिक विद्यालयका विद्यार्थीहरु शैक्षिक भ्रमणको लागि रकम मांग गर्दै आन्दोलित भएका छन । कालिकामाई गाउँपालिकाको वडा नं. २ भेडिहारीमा रहेको विद्यालयमा अध्ययनरत कक्षा १० का विद्यार्थीहरु शैक्षिक भ्रमणको लागि रु २ लाख रकम मांग गर्दै आज वडा कार्यालय र गाउँ कार्यपालिकाको कार्यालय घेराउ गरेका हुन ।
कालिकामाई गाउँपालिका वडा नं. २ को वडा कार्यालय, भेडिहारी विद्यार्थीहरुले घेराउ गरेका थिए । वडा कार्यालय घेराउको केहि बेर पछि वडा अध्यक्ष सोनालाल चौरसियाले शैक्षिक भ्रमणको लागि गाउँ कार्यपालिकालाई रु २ लाख रकम उपलब्ध गराइदिन सिफारिस गरेको विद्यार्थीहरुले वताएका छन । त्यस पछि विद्यार्थीहरु गाउँ कार्यपालिका कार्यालय मुडली पुगेका थिए ।
गाउँ कार्यपालिकाको कार्यालय पुग्दा एउटा पनि कर्मचारी नभेटेको विद्यार्थीहरुले वताए । कार्यालयमा भएका कर्मचारीहरु पनि वेपता भएको विद्यार्थीहरुको भनाई थियो । गत बर्ष पनि हामीले खेलकुदको लागि गाउँपालिकाबाट कुनै सहयोग पाएका छैन र यस बर्ष पनि पाठ्यक्रममा अधारित अतिरिक्त क्रियाकलाप प्रयोजनको लागि गाउँपालिकाले केही उपलब्ध नगराएको गुनासो विद्यार्थीहरुको छ ।
यस बिषयमा प्रमुख प्रशासकिय अधिकृत देवनाथ साह संग बुझदा आफु कार्यालयको कामले वीरगंज रहेको र केही कर्मचारीहरु विदामा रहेको वताए । अहिले गाउँ सभा नै नभएका कारण शैक्षिक भ्रमणको लागि बजेट कहांबाट उपलब्ध गराउन सकिने प्रश्न गर्दै साहले पछि उपलब्ध गराउन सकिने वताए ।
