वीरगञ्ज । पर्साको जगरनाथपुर गाउँपालिका–५ मसिहानीस्थित नेपाल राष्ट्रिय माध्यमिक विद्यालयमा कक्षा ११ मा अध्ययनरत ८५ जना विद्यार्थीलाई विद्यालय पोसाकका रूपमा कोट र पाइन्ट वितरण गरिएको छ।
शुक्रबार विद्यालय परिसरमा आयोजित एक कार्यक्रमबीच गाउँपालिका अध्यक्ष श्रीकान्त प्रसाद यादवले विद्यार्थीहरूलाई कोट र पाइन्ट वितरण गरेका हुन्।
विद्यार्थीलाई उच्च शिक्षा अध्ययनका लागि प्रोत्साहित गर्नुका साथै किशोरकिशोरीमा शिक्षाप्रति आकर्षण बढाएर अध्ययनलाई निरन्तरता दिन प्रेरित गर्ने उद्देश्यले गाउँपालिकाको तर्फबाट पोसाक वितरण गरिएको अध्यक्ष यादवले बताए।
उनले विद्यार्थीहरूलाई शिक्षामा पहुँच बढाउन र अध्ययनप्रति उत्साहित बनाउन गाउँपालिकाले यस्ता कार्यक्रमलाई प्राथमिकता दिएको बताए।
अध्यक्ष यादवको प्रमुख आतिथ्यतामा सम्पन्न कार्यक्रममा विद्यालय व्यवस्थापन समितिका अध्यक्ष मुस्लिम मियाँ, प्रधानाध्यापक हस्मुदिन राउत गदी, शिक्षक–शिक्षिका, अभिभावक तथा अन्य सरोकारवालाको उपस्थिति रहेको थियो।
